من القلب

مفيش اى انسان ايا كان الا وهو داخل على 2011 بيدعى تكون بداية جديدة و سعيدة بداية من العالم العلامة ووصولا لام سحلول انا وانت وانتى وهما واللى هناك واللى هنا
,طبعا لان الاكتئاب و الحزن و فقدان الامل بقى ظاهرة عالمية انسانية و ده نتاج طبيعى لهذا العالم الذى توحش و خرج من طور الانسانية الى حد التوحش الحيوانى طيب والنبى انا كارمه البشرية كمان بالتشبية ده لان اشرس الحيوانات شراستها مرتبطة بفطرة الدفاع عن النفس من اجل البقاء وليس من اجل الطمع والجشع و الانانية ,زينا كده يعنى الاسد لما بيشبع خلاص مابيمشيش يقرقش فى اللى رايح واللى جاى فراغة عين عكسنا احنا كل ما الواحد يوصل بيطمع ,و النبى قبل ما حد يعترض و يقولى انى بلغى فكرة الطموح هرد اللى أقصدة مالوش علاقة بالطموح يا ريت البشر و الدول يبقى عندها طموح لان الطموح هو سبيل الرقى والتقدم الايجابى مش ابدا الطمع فيما ليس لى و لك المهم نرجع لموضوعنا كلنا كده جايبين جاز وبنزين وزيت من الحياة ويا ريتها جت على قد الحياة كانت هانت, لكن كمان جايبين بترول من بعض و سامعة حد بيقول انى بقول اى كلام لاء يا استاذ ولا يا استاذة ,انا مش بقول اى كلام لو كان بينا الحب و الموده الحقيقيين كنا ساعدنا بعض و كنا بقينا اسعد واهدى, لان من اسباب سعادة الانسان الكبرى شعوره بالحب يحب و يتحب و يحس ان ليه سند حقيقى, يوم ما الدنيا تلطش معاه يلاقيه جنبه يحكيله يشكيله يساعدة يأخد بايده احنا بقينا بنأخد على خاطرنا من بعض و بطلنا نأخذ بأيد بعض, عارفين مشكلتنا كشعب و دولة اننا مبقناش بنحب بلدنا الا بأغنية بلدنا فى القلوب متشالة او ماتش كورة الحضرى ينوره و باقى ايام السنه شكرا اوى ,منعطلكيش يا مصر هو احنا فى ايدينا حاجة ايوه فى ايدينا نبطل تخريب فى كل حاجة فى الجنينة و الاوتوبيس نرحم نفسنا من تف البلغم فى الشوارع و ننقل امراض لبعض بالسلوك السىء ده و بدل ما بنرمى الزبالة من الشبابيك نرميها فى الصناديق صعبة ديه هنقول الحكومة المفروض تعمل ايوه المفروض لكن اذا كانت حكومة دماغ وفسادها واصل للقفص الصدرى و عندها بطىء فى الحركة وقلة دم نبقى زيها, احنا بقى ونكمل على البلد ونقول ما هى خربانة خربانة فنكون احنا بقى من كبار المساهمين فى العملية التخريبية الله على التفكير شوفوا بقى احنا عايزين نصلح خلاص نبدأ بأنفسنا و اكيد مع الوقت احتمال تبقى فره وبدل ما يجيلنا انفلونزا الخنازير تجيلنا انفلونزا النظافة والنظام و الايجابية والمشاركة ولا ايه يا حلوين نرجع لمرجعونا بتاع الكابة و الحزن وفقدان الامل تعالوا بقى نتخيل كده لو صحينا فى يوم مبتسمين و بنحب بعض و ايجابين و بنساعد بعض هيبقى يوم عامل ازاى هيبقى فلة يا سلام طبعا دلوقتى فيه ناس هتقولى لو عايزين نبقى مبسوطين لازم نقرب من ربنا فعلا احنا لازم نقرب من ربنا لكن مش بالطريقة السائدة دلوقتى الهى تشدد فى الدين و اقعد ادى الناس مواعظ واكلمهم عن طول البنطلون و الفستان لاء فستان ايه بقى العباية و ندعوا انك تصلى 3 ساعات و نص و تكره كل من يختلف عنك وتعتبره من الفاسقين او الكفار و الدين مش كده اصلا وربنا مطلبش مننا نعمل كده , ربنا فرض الصلاة 5 مرات فى اليوم الصلاة الواحدة ما بتاخدتش اكتر من خمس دقائق ,طيب ليه ربنا مخلاش الصلاة الواحدة ساعة لسبب بسيط اوى الله عز وجل فى كل تعاليم ديننا لم يشق علينا, يبقى احنا ليه بنصعب الدين و الدنيا على نفسنا وربنا خالقنا رحيم بينا ليه منقربش من ربنا باننا نعامل ربنا فى كل افعالنا, على فكرة هو ده الدين الصح نتقى ربنا فى كل حاجة نصلى و ندعى ونشتغل و نصلح نفسنا ونعامل بعض بالحسنى ,انما الدين المعاملة, من غير كلام كتير و نبطل بقى نعمل على بعض شيوخ ووعاظ, لان الموضوع بسيط الحلال بين والحرام بين و كل نفس بما كسبت رهينة ,فبدل ما بنتكلم على الدين ما نعمل بيه و نفهم ان علاقة العبد بربة علاقة خاصة ,ربنا منصبناش حكام عليها الرحمة بقى يا ناس و كفاية مجادلات فاضية سيبوا الخلق للخالق و كل واحد يخليه فى نفسة المحتاج يعرف تعاليم الدين يقرأ للعلماء الافاضل و ما اكثر كتبهم, وسيبكوا من شيوخ اليومين دول المتشدد منهم والفاتحها على الرابع كده .شوفوا بقى ما هو يا السنة ديه تبقى سعيدة يا تنضم لسنين الهم اللى سبقتها و كل واحد له مطلق الحرية فى الاختيار عايزها سعيدة اصحى كده واغسل وشك وقلبك ودماغك من كل السواد اللى فيهم ,دماغك مليانة صراصير رش فليت الاصلى قلبك مليان حقد اغسلة بالتوبة وشك مليان كأبة ارسم عليه ابتسامة فى الاول هتبقى صفراء لكن اكيد مع الاصرار هتبقى صافية طالعة من القلب النظيف اللى كله حب وخير و من العقل المتفتح الواعى واكيد هتكون النتيجة انسان جديد قادر على خلق سنة سعيدة بيحب و يتحب وكله طالع من القلب قولتوا ايه بقى هنبدأ مع بعض نجرب كده وان شاء الله ربنا هيكرمنا لاننا هنبقى صح من القلب,فلنتغير لنغير (:.