حسام البدري وأمير سعيود

بالبلدي

بصراحة مش عارف ابتدي منين ولا منين.. ابتدي من اعتداء بعض الجزائراين ولا ابتدي بالحديث عن الموهوب أمير سعيود الجزائري
أمير سعيود عنقود في شجرة الموهوبين مثل الاسطورة مارادونا والعبقري ميسي وهوه برضه ارجنتيني زي مارادونا ومن مصر كان يمتلك الموهبة والعقبرية نجم النجوم مارادونا النيل طاهر ابوزيد وأنا متوقع أن يحقق أمير سعيود مجدا ونجاحا مع النادي الأهلي ومندهش ازاي الاخ حسام البدري المدير الفني لم ينتبه للموهبة الفطرية العبقرية التي يمتلكها لاعب دولة الجزائر أمير سعيود.. ياكابتن بدري حرام عليك كفاية ظلم لامير سعيود.. وأسيب أمير سعيود وأروح للاخوة الجزائريين اللي اعتدوا علي لاعبي الأهلي وضربوهم وحاصروهم في الملعب بعد انتهاء المباراة مع فريق شبيبة القبائل الجزائري. وأقول للأخوة الجزائريين ان جميع وأغلبية المصريين محتارون ومندهشون.. ليه بعض الجزائريين بيكرهوا المصريين وكل مباراة نلعبها معاهم يقوموا يضربونا ويعتدوا علينا.. ضربونا في بلدهم مع المنتخب القومي ومرة ثانية ضربوا جماهير مصر في السودان والمرة الثالثة ضربوا اوتوبيس لاعبي الأهلي.. حسبي الله ونعم الوكيل في الجزائريين واللي بيساندهم من المسئولين المصريين. اللي بيعمله الإعلام المصري والتليفزيون المصري والفضائيات في المصريين والمسلمين حاجة مزعجة خاصة عندما تعرف أن عدد المسلسلات والبرامج اللي بتعرض في رمضان أكثر من مائة مسلسل وبرنامج، وأستعير اسم برنامج اديني عقلك وأقول للفنانين والممثلين المشاركين في المسلسلات اديني عقلكم.. ازاي المشاهد المصري حيقدر يتابع كل المسلسلات والبرامج اللي بتعرض في رمضان؟!
ده لو الواحد حيشوف من كل مسلسل أو برنامج خمس دقائق بس يبقي قاعد أمام التليفزيون طول الليل والنهار وابقوا سلمولي علي شهر رمضان اللي مفروض يكون شهر القرآن.