الأهلي يحتاج إلي مدير فني أجنبي.. وعودة الحضري

بالبلدى

· الأهلي محتاج حارس مرمي لأن النادي الأهلي من ساعة ما سابه عصام الحضري مفيش أي حارس مرمي قدر يملأ مكانه
مع احترامي للكابتن حسام البدري المدير الفني للنادي الأهلي إلا أني مش مقتنع بيه أن يستمر مع النادي الأهلي لأنه واضح قوي أن منصب المدير الفني واسع علي الكابتن البدري
اللي نجح في دور الرجل الثاني مع جوزيه وفشل في دور الرجل الأول مكان العبقري الأسطورة جوزيه.ومن الاخر كده النادي الأهلي مينفعش معاه غير مدير فني أجنبي لأن أي أي مدير فني مصري هيتأثر بالعواطف والعلاقات الإنسانية مع اللاعبين بعكس المدير الفني الأجنبي اللي لايتأثر بالعلاقات الإنسانية والعواطف مع اللاعبين. ولايهم المدير الفني الأجنبي سوي مستوي وأداء اللاعبين في الملعب. يعني بالبلدي كده النادي الأهلي محتاج مدير فني أجنبي وكمان الأهلي محتاج حارس مرمي لأن النادي الأهلي من ساعة ما سابه عصام الحضري مفيش أي حارس مرمي قدر يملي مكانه ومش عارف ليه مجلس الإدارة بيعاند ويكابر في عودة الحضري للأهلي، هو مجلس الإدارة ده مش برضه هرب في عهده اللاعب ابراهيم سعيد وبعدما رجع واعتذر فوجئت جماهير الأهلي بمجلس الإدارة يعيد ابراهيم سعيد ويقبل منه اعتذاره ليه بقي العند مع الحضري اللي الأهلي محتاج ليه دلوقتي أكثر من أي وقت لأن الأخوة حراس المرمي في الأهلي الأربعة لعبوا وهم أمير عبدالحميد رمزي صالح وشريف اكرامي وأحمد عادل عبدالمنعم الأربعة دول ينفعوا يوقفوا عساكر مرور أو عساكر أمن مركزي من اللي بيحرسوا السفارات مش يقفوا يحرسوا مرمي النادي الأهلي. وبالنيابة عن نفسي وبعض جماهير الأهلي اللي أعرفهم أقول لمجلس الإدارة الأهلي محتاج مدير فني أجنبي وعودة الحضري. والأسبوع القادم نرجع لصديقنا المسطول علشان نشوف إيه اخرتها في الحشيش المضروب بجاز وسولار اللي احنا بنضربه ده.