استقالة البدري بعد خرابه للأهلي

بالبلدى

بقالنا سنتين واحنا بنكتب في «صوت الأمة» ان حسام البدري لا يصلح مديرا فنيا للنادي الأهلي وقلنا وشرحنا كتير من الاسباب والمواقف اللي تؤكد صحة وجهة نظرنا ورأينا في البدري ان بدلة تدريب النادي الأهلي واسعة عليه وانه مش معقول ان يكون المدير الفني للنادي الأهلي كل تاريخه مدرب عام وييجي يمسك منصب المدير الفني للأهلي قبل ما يكون قد درب أي فريق وهو مدير فني ولكن للأسف الشديد إدارة الأهلي كانت بتعاند جماهير الأهلي وفين بعد «خراب مالطة» وخراب النادي الأهلي وبعد ما كان الأهلي ولاعبيه وجماهيره مصدر رعب للأندية اللي بتلاعب الأهلي اصبح الأهلي في عهد البدري ملطشة لكل الفرق وشوفوا مباريات الأهلي مع الجونة ومع الاسماعيلي وانت تشوفو وتصرخوا إزاي الكابتن حسام البدري خلي الأهلي خرابة وقام بتدمير اللاعبين اللي كان بيختارهم للمشاركة في المباريات وتسبب البدري باختياراته وتشكيلاته الغريبة في ضياع روح الفانلة الحمراء التي كان يتميز بها لاعبو الأهلي عن باقي لاعبي الأندية الأخري.
أنا مش فاهم إزاي الكابتن حسن حمدي لم يتعلم من الكابتن الاسطورة الراحل صالح سليم في طريقة إدارته للنادي الأهلي.
الكابتن صالح سليم رحمه الله كان بيمشي علي مبدأ ان النادي الأهلي لا يصلح معه سوي مدير فني أجنبي ولذلك نلاقي أغلب سنوات حكم الراحل صالح سليم كان المدير الفني للأهلي دائما أجنبي مش مصري وأثبتت التجارب الكثيرة أن الأهلي مينفعش معاه غير مدير فني أجنبي لذلك نتمني أن يختار حسن حمدي ومجلس إدارة الأهلي.مديراً فنياً أجنبياً يليق لسمعة وإسم النادي الأهلي اللي مرمطها المدرب السابق حسام البدري اللي أنا وجماهير الأهلي بنقوله «ياكابتن بدري كان بدري عليك .. عليك بدري».