قصيدة حبة عيال !!!

الشاعر : هاني أبوالفتوح
من بدري صاحيين فرحانيين
اللي قام يغسل في وشه
واللي أْكَلْ لُه لقمتين
واللي يحفظ آية حتى
وللا سَمَّع جملتين
....................
فرحة كانت في قلوبهم
وف عنيهم
بس كان غايب عليهم
إن قدر الموت بدايته
بعد كام خطوة ونهايته
يكتبوها وقت ما يضيع الأمان
والقدر واقف هناك
مستني فوق المزلقان
ف ثانية واحدة جه طوفان
يحصد قلوب يحصد كمان
كل أحلام البراءة
والطفولة والإيمان
واللي كان مستني أمه وللا أبوه
مالحقوا حتى يودعوه
في السما طاير على أعلى الجنان
.....................
دايما كده
المصايب يعملوها الكبار
يقعوا فيها العيال
طب قولوا لي
يقولوا إيه باقي العيال
لما شافوا هَمْ أقوى من الخيال
لما شافوا قسوة فوق كل إحتمال
...........................
البراءة والطفولة والجمال
في لحظة واحدة اتجمعوا ويا كراسة
ومصحف ويا لقمة بالحلال
ويا إيد وللا رجل
وللا دراع مقطوع وطار
وسط بركة دم سايله
والسؤال
مين نحاكمه ومين نحاسبه
ومين نعلق له المشانق
ومين هنضرب بالنعال
.......................
إسمعوا دمع الحزانى
واسمعوا المسؤول حدانا
لما يتشملل سلامته
وكام جنيه تعويض عطانا
وللا قام يعمل زيارة للمكان
وللا شَكِْل لجنة حتى للجرايد
وسد خانة
زي ألف وألف لجنة
شكلوها من زمان
خدنا إيه من ناس جبانة
ومين نداين ؟ مين مدان ؟!!!
..................
والمثير
لما قبلوا استقالة من وزير
وأما قالوا كلام خطير
وأقسموا بالله كمان
السبب كان مزلقان
قول فساد قول خيانة
قول إهمال
كل دول مش مهم
حتى اللي ماتوا مش مهم
دول يا دوب حبة عيال