لا تقل مشروع النهضة ولكن مشروب النهضة

محمد مرسى يستحق لقب رئيس جمهورية الكلام بس، لأنه من ساعة وصوله إلى منصب الرئيس من اربع شهور وهو لا يعمل حاجة غير الكلام بس يقول كلام ويرجع فيه يلحسه يعنى، والامثلة كثيرة اشهرها كلام مرسى عن النائب العام المستشار عبدالمجيد محمود الذى اعطى مرسى درساً لن ينساه طوال حياته. الرئيس مرسى هارى الشعب المصرى خطب من الجوامع والكلام اللى بيقوله مرسى فى خطبه فى المساجد كله كلام، حتى إنى اقترح عليه هو وجماعته الإخوان المسلمين سابقاً الإخوان الكذابين حالياً أن يصارحوا الشعب بالحقيقة ويقولوا للشعب إن مشروع النهضة ده وهم كبير وما هو إلا «مشروب النهضة» وزى ما كان حسنى مبارك بينصب ويضحك على شعبه بمشاريع وهمية وهارانا مبارك خطط خمسية فاشلة للنصب على الشعب حالياً مرسى وعصابته الإخوان بيضحكوا على الشعب المصرى الغلبان بمشروع النصبة أو مشروب النهضة، وأحب اقترح اقتراح تانى للاخ مرسى وعصابته الإخوان النصابين، إيه رأيك يا مرسى فى مشروع النهضة، تخليه «مشروب النهضة»؟.وأهو تبقوا كذبتوا على الشعب بمشروع النهضة وشربتوا الشعب مشروب النهضة فى صحتك يامرسى إنت وحزبك عصابة الإخوان المسلمين اللى بيكذبوا باسم الدين. قالوا نروح للرئيس مرسى فى اعجب واعذب كلام قاله رئيس جمهورية الكلام محمد مرسى بعد صلاة الجمعة بمسجد عمر مكرم بمحافظة اسيوط، الرئيس مرسى قال فى كلامه إنه إذا لم تحقق الثورة اهدافها فإنه يدعو الشعب المصرى إلى ثورة ثانية جديدة. وبالبلدى كده الكلام اللى بيقوله رئيس جمهورية الكلام محمد مرسى يشبهه كلام وتخاريف الرئيس الكوميدى الراحل معمر القذافى اللى دعا شعبه الليبى إللى بيحكمه أن يقوم بثورة ضده وبالفعل خرجت مظاهرة من الشعب الليبى وتزعم المظاهرة الرئيس الكوميدى الليبى معمر القذافى إللى كان أول رئيس فى العالم يعمل مظاهرة ضد نفسه مع الشعب إللى بيحكمه لذلك انصح الرئيس المصرى الكوميدى محمد مرسى أن يفعل مثلما فعل القذافي، الحمد لله ربنا خد مننا الرئيس الكوميدى العربى الليبى معمر القذافى واعطانا رئيس مصرى كوميدى هو محمد مرسى إللى يمكن يكون مطرب أو ممثل أو يمسك جامع يقول فيه خطبة الجمعة أو يشتغل أى حاجة بعيداً عن رئاسة الجمهورية إللى شغلته فيها حالياً «بوروللووم» زى ما قال العبقرى الراحل الشاويش عطية «رياض القصبجي» فى فيلم «إسماعيل ياسين فى الاسطول».
نشر بالعدد 621 بتاريخ 5/11/2012