"طز فى ذاتك "

طز ف ذاتك
كل ذواتك
وزريبتك
وجميع اخواتك
واللي جابوك
واللي خادوك
واللي عملّك انتخاباتك
واللي دعالك
واللي دعيتلُه
واللي اترشح فيها قصادك
كل ما اشوفك
ولّا أشوفه
لازم
أهتف
طُز ف ذاتك
طُز ف ذاتك مليون طُز
كنت ف جرّه طلعت لبرّه
ونسيت سجنك بعد العِز
قامت ثورة لمصر الحرّة
جيت تسجنها زي الغُز
روح تتغز ف كل ذواتك
طُز ف ذاتك
قلت مفيش حرف هايتقص
وانت مقص وابوك منشار
بيقولوا قلبك قلب الخص
اخص عليهم دا انت دمار
جي بتحرق ثورة عظيمة
بس بعيد عنك يا حمار
دايمة الثورة عشان غباواتك
طُز ف ذاتك
وبتتسلف لاجل تخلّد
وتجوّعنا وانت مخدّد
وبتخطب فينا وبتجوّد
"وحرم الربا" تِلحِنها
على حسب اهواءك تفسيرها
تصبغ دقنك أو تنتفها
هانشيلك كما شلنا ساداتك
طُز ف ذاتك
قلنا وادينا بنقولك تاني
مصر بلدنا مش لأناني
مصر لكل المصريين
تبدُر قمح وتطرح تين
هدوا السجن مفيش مساجين
خضروا أرضه بالبساتين
وانت استبن واكل بُستانك
طز ف ذاتك