«جاويش» يروي شهادته: الضابط طلب ترخيص صفحة «الورقة» على «فيسبوك»

وجه إسلام جاويش، الرسام الكاريكاتير، وصاحب الصفحة الشهيرة على موقع التواصل الاجتماعي «فيس بوك»، الشكر لما تضامن معه عقب القبض عليه.
ونشر «جاويش» بيان له، اليوم الثلاثاء، عبر صفحته الشخصية على موقع التواصل الاجتماعي «فيس بوك»، قائلًا: «أول حاجة شكرًا لكل واحد وقف جنبي، وكل واحد تضامن مع الموضوع، وبشكر رسامي الكاريكاتير كلهم على موقفهم، والكُتاب ونقابة الصحفيين والفنانين والحقوقيين والإعلاميين، وكل من نشر بيانات تضامنيه والجمهور والأصدقاء، واللي طعن واتهمني بدون وجه حق ربنا يسامحه».
واسترجع «جاويش»، ما حدث له أثناء القبض عليه: «الساعة 12 دخل مجموعة من ضباط مباحث المصنفات، وبدأت تفتش المقر وتصوره، فحصوا أجهزتي الخاصة، وبعدين أجهزة الشركة، سألوني على بعض الأشخاص في البداية، ده كله وأنا مشوفتش أصلًا أمر النيابة ولا عارف هما عايزين مين بالأخص، سألني أكبر الضباط سنًا على اسمي وعملي، وقلت له إني إسلام جاويش وبشتغل رسام كاريكاتير، وعندي مشروع صغير هنا اسمه الورقة، وخليتهم يتفرجوا على حاجات من شغلي، الضابط خد بطاقتي الشخصية وسألني: هل لمشروع الورقة ترخيص؟.. قولتله ترخيص إزاي يا فندم؟ قالي: أنت بتدير موقع بدون ترخيص، وحاولت مرارًا إني أفهمه إنها صفحة «فيسبوك» مش موقع أصلًا».
تابع: «سألني بعدها عن المحتوى الإخباري، قولتله مليش علاقة بيه برضه وكل معلوماتي عنه إنه متوقف تمامًا من شهور، بعد فحص الأجهزة لقى عليها بعض رسوماتي وهو بيشوفها قاللي: أنت بترسم اسقاطات سياسية!، أنا مش عارف أصلًا هو شايف إيه علشان بيكلمني من ورا الشاشة، فقولتله بالنص: إن دي أفكار في الشأن العام وإيه مشكلتها؟، ثانيًا إن اهتمامي بالأفكار اللي تشدني كرسام كاريكاتير، أنا مش شايف حضرتك بتدور في إيه، وأعتقد إن في كاريكاتيرات لرساميين تانيين غيري، لأن الجهاز اللي حضرتك بتفحصه جهاز شركة، ومش جهازي الشخصي أو اللي برسم عليه، قاللي لا دي سياسية وبتاعتك من الورقة والsign بتاعتك واضحة زي الشمس أهو!، أمر الضابط بحرز الجهازين وجهاز «راوتر» رغم إن الشركة فيها أكتر من راوتر، ونزلت معاهم أنا والمدير المالي للشركة اللي أخد بطاقته هو كمان».
استطرد قائلًا: «في الساعة 1 تقريبًا اتجهنا لقسم أول مدينة نصر مع مجموعة ضباط مباحث المصنفات، وبعد ما استنيت شوية بره رجّعوا البطاقة للمدير المالي، وقالوله امشي، وقالوا إن إسلام هيستنى معانا، قُلت ماشي، دخلت أوضة وكان فيها اتنين ضباط من اللي كانوا مرافقين للحملة، وقالولي بص على أقوالك وامضي، بصيت على الأقوال لقيت مكتوب إني بدير موقع بدون تراخيص وعندي أجهزة كومبيوتر بدون ترخيص، وإني بصمم جرافيك على برامج غير مرخصة!، وإني برسم كاريكاتير فيه اسقاطات على رموز الدولة!، دا كله في هيئة أسئلة ومتجاوب عليها كمان!، قالولي لو حابب تعدل في إجاباتك عدل، قولتلهم أنا ما اطلعتش على المحضر من الأساس، قالولي مش مهم المحضر المهم أقوالك، قولتله يا فندم أنا مبفهمش في القانون ومش همضي إلا في وجود المحامي، بعد شوية محاولات في اقناعي بالإمضاء وإني لو ممضيتش مش هيبقى في صالحي، قاللي خلاص هكتب محضر من أول وجديد وهقول إنك رفضت الإمضاء، وده مش في صالحك، بعد الكتابة لقيتهم بيقولولي مبروك يا إسلام بابتسامة، «انا مفهمتش ليه»، أخدني واحد من ضباط المصنفات لضابط الحجز واداله رقم المحضر، وبعدها قاللي مع السلامة يا إسلام ومشي».
اختتم البيان قائلًا: «فضلت متواجد في القسم حتى الصباح بمرافقة أحد ضباط مباحث القسم، وتوجهت للنيابة الساعة 10، قبل العرض على النيابة وبعد ما الموضوع انتشر جدا على السوشيال ميديا عرفت التهم الموجهة لي حسب بيان وزارة الداخلية، اللي هي عبارة عن اتهامات إدارة موقع بدون تراخيص وما ورد في البيان الداخلية، واختفى فجأة اتهام "إني برسم كاريكاتير فيه إسقاطات سياسية"، اتعرضت على النيابة، واطلعت على نص التحريات، والمحامين اطلعوا على المحضر، وجت التحريات لا تدينني بأي شئ، وخرجت من سرايا النيابة مخلى سبيلي!، ملحوظة: تغيير التهم هو اللي خلانا نمسح بعد كدة البيان الأول من صفحة الورقة بعد ماكتبنا اني اتسألت عن الرسوم المسيئة!».
«عمومًا هفضل أرسم أفكاري.. مش هابطل رسم، وهكمل اللي أنا حابه وهفضل شغال فيه، وأنا لا بطبّل لحد ولا بشتم حد، ولا منحاز فكريًا لحد، وليا أرائي سواء الفكرية أو السياسية الخاصة، ولا متطرف في الحوار ولا بدعي البطولة والمثالي، وبشكركم جميعًا.. #سوابق_مستجد‬ ‫#اسلام_جاويش‬».