القارئة مروة يونس تكتب: شُقِّي يا مصر (قصيدة)

شُقِّي عَليِّا يا مصر
أَصلي مِعَبِّي الرَسَايل
طول عمري و أنا بكتِبلِك
و في قلبي كاتم و شايل
سامعة يا مصر النِدا
شيلي معايا الحلم
خِفِّي عَنِّي الحَمَايل
هاحكيلِك على زَرعة...
زَرعة شيطاني
على أرضِك كِبرِت.....
و ثِبتِت في ثواتي
شجرة خبيثة طََرحِت
و الجِدر مَدّ..
إشتَدّ!
من هَمّي جَمَعِت ما طَرحِت
عودها عَليّا إحتَدّ
طايفين حواليها....أمَر
مَعرَفش كُوع من بُوع
مَجِّد وعظَّم ...
هَلِّلّ و طَبِّل
وجَعَك سَجين الضُلوع
في البيت ... في العَطفة و الشارع
صاحبنا الفقر...آنسنا الكرب ...عاشرنا الجوع
نِسيِتْ الطاقة الحَناجر
إدِّت قَفاها لِكُل جوف
إنزل بِطِنّ سَحاب
خلّي البَصير ما يشوف
و إنزع بذور الحق
وشّ الجسارة....
مطموس بالكسوف
يا سعادة الباشا
فَوَّق!
أنا مش بهيمة
ولا شكلي خروف
بَندَر..كُفٌور و نُجوع
هنِمحي هواجِس الخوف
إن سَدّوا مليون صوت
صوتي لوحده شعب
إن شيِّد ألف سور
ملا أرضُه كَمْل البُحور
راح ألاقي غيره درب
دُقنا تُراب الجِزَم
و برضه لينا رب
و الحزن رُزَم و حِزَمْ
فا مَلَكشي غير الكعب
سِمعنا كل خُطبة
و شِرِبنا كل بيان
الدور عليك بأه تسمع
و تطرطأ الودان
طافحين الكوتة
عايشنها بموتة
ما المستخبي أهو بان
ماسِك زي القُرادة
بعَمَل عفاريت و جان
لو حتى في بَطْن الأرض
هلاقيله ميت عنوان
يا خينا....
حِسّ بينا
هتجِبلي سِتين عِلّة
وش الأب الشفتشي
مِداري في طياته ذلة
قالوا العِصابة نُحُط العُصابة
لأجل الحياة ما تِتحَسّ
قِلّة ....
شِلّة خسيسة
نِزْلوا و الشر إندَسّ
عُملاء و خَوَنة دولة دسيسة
و الدَم..لعروقه إجتَثّ
هَلِّب يا سيدي و خَنسَر
كُلْها بنارها والعة
كَفنَك مالوهش جيوب
أنا فُلّة
بصَحفة ناصعة
قديس بلا عيوب
لكن تحت التراب
.......
الأسياد كلاب
فاسد و ندل
و هتِقرا الكتاب
ما ساعة الظلم ولِّت
واخدة في إيديها الباب
ولا فيها مَخَرج ولا ليها رجعة
ولا إِنْسي ليك هيسمَع
على قبرك
دايسة الدواب
على توبَك البُقعة ناقعة
فاضحة
واضجة..... و فاقعة
و لسة برضُه كوسة
و فلان برضه ارتَشى
يا أفندي إرحم كفاية
إبليس نفسه إختشى!
و داهية دُقَي علينا
دي الحُمّى في السِلسال
مصر في طبق فضة
هدية للأنجال
ما هو شارع.....
و خانع
لا رادع لا مانع
غافلة و نايمة البغال
لكن خلاص
وقت الخلاص
وفيت بالعهد
نفيت الظلم نهيت ده العهد
هتاكلي الشهد
هتلبسي دُرَ
فارِشلِك مَهد
طريقك حُر
نِفني لهواكي اجيال
و فداكي ألف عمرْ
و أكتب بعَرَقي تاريخِك
و تَحتَه خَطّين حُمْر