عمرو أديب يقترح منح المحتاجين نقودا في عيد الأضحى: في ناس مش عاوزة تاكل لحمة

قال الإعلامي عمرو أديب، إنه يعتزم توزيع نقود على المحتاجين في عيد الأضحى، إلى جانب تخصيص جزء من أمواله للأضحية، مؤكدًا أن رأيه لا يستند لأي شيء فقهي.
وأضاف خلال تقديمه لبرنامج «الحكاية»، المذاع عبر فضائية «MBC مصر»، مساء الاثنين: «سعر العجل ما بين 70 ل90 ألف جنيه، أنا شخصيًا ناوي أقلل عدد اللحمة وأعمل الأضحية بتاعتي والباقي أديه فلوس للناس».
ونوه أن جزءًا كبيرًا من الأضحية عبارة عن هدر، قائلًا إن المواطن يحتاج النقود لتلبية احتياجاته في تلك الأوقات الصعبة.
وأكمل: «الناس محتاجة الفلوس أكثر من اللحمة، حد يشتري دواء أو يتعالج أو يشتري ملابس، أهم كتير من اللحمة، ندي الناس فلوس في إيدها لو عندها دين تسده أو فاتورة كهرباء، أنا ناوي أعمل كده ولا ألزم أحد».
وذكر أن الأمر يقلل الضغط على اللحوم، بما ينعكس بالتبعية على الأسعار، قائلًا: «اعمل 10% أضحية، إدوا الناس فلوس في إيدها لأنهم طالعين من امتحانات ثانوية عامة وامتحانات شهادات ورمضان، هو ركن وفرض محدش قال حاجة، لكن بالنسبة للناس القادرة وسعوا على الناس».
وأكمل: «لا أتحدث عن الفقراء والمساكين، في ناس عندها تحديات، ناس في عيلتك حد فقير يعالج أمه ويودي عياله مدارس، الخير يقع أكثر بالفلوس، ده رأيي، والظروف اللي إحنا فيها محتاجة تكافل ومساندة أو اتبرع بيهم لمستشفى.. حتة اللحمة مش هتعمله حاجة، في ناس مش عاوزة تاكل لحمة في ناس عاوزة تعيش».