كوكب الكرة وأقوى مباريات الساحرة المستديرة

مش غريب ان يكون اقوى رئيس جمهورية على وجه الارض هو رئيس الاتحاد الدولى لكره القدم , ببساطه لأنه رئيس جمهورية كرة القدم اكبر وأقوى جمهورية على الكوكب الاخضر كوكب الأرض باختصار كوكب الكره .
سكان الجمهوريه دى يقدر ب مليار و800مليون حول العالم حسب اخر احصائيه لمتابعه النشاط الكروى حول العالم يعنى بكده يبقى عدينا الصين وكوريا مجتمعين ومش غريب برده ان اقتصاد الجمهوريه دى يوصل لأكثر من 300مليار دولار سنويا من دعايه واعلان لتسويق البث لتنظيم حقوق مباريات لمسابقات لبورصات لاعبين ليله كبيرة اوى مش بقولك اقوى دولة على الكوكب , هى دولة كره القدم .
وطبعا كوكب الكره ده ميخلاش من صراع العمالقه نزال الفرسان لقاء السحاب قول زى ما انت عاوز وخللى اللى جنبك كمان يقول لكن لما نتكلم عن اقوى ديربيات الكره لازم نستعد ونستعد اكتر ونمسك فى حرف الكنبة قوى عشان احنا داخلين على حرب الكواكب وتحذير اللى جاى ده يا جماعة للكبار فقط , هنبدأ مع بعض العد التنازلى لأقوى دربيات الكره على وجه الأرض .
10- هأرتس اوف اوك & كوتوكو
ديربى الكرة الغانية المعروف بديربى الموت مش هتكلم كتير كفايه اقولكم انه فى أحد مباريات الفريقين اللى بيكون الجيش الغانى كله حولين الاستاد الدولى فى العاصمة أكرا فى 2001 مات 130 مشجع بسبب التدافع داخل الملعب لأن ببساطه كوتوكو كان متقدم على هارتس حتى الدقيقه 85 بهدف لكن هارتس قلب المباراة واحرز هدفين مما اثار حفيظه مشجعى كوتوكو وانطلقوا داخل الملعب معرفش بصراحه كانوا عايزين مين بالظبط المهم بالصلاه على النبى راح فيها 130 بس و فى مبارات تانيه بينهم فى عام 2009 اتقتل 4 بسبب الاختناق داخل الملعب مش بقولك ديربى الموت .
9– اولمبياكوس & بناثنيكوس
ديربى الاغريق او ديربى الاعداء للابد كما يطلق عليه. دة بقى ديربى عنده 90 سنه الفريقين بيتنافسوا منذ عام 1925 وده تاريخ تأسيس بناثنيكوس وسبقه فى العام 1908 نادى المبياكوس ودول بقى اقل دمويه شويه من الديربى اللى قبله غايه ما هناك ان لما فريق بيكسب جمهور الفريق التانى بيولع فى الاستاد زى ما حصل بين الفريق فى مباراه تحديد بطل الدورى اليونانى فى 2012 .
8– أهلى & الزمالك
وسع يا جدع معلش وسعت السين شويه , المهم دول ولاد بلدى يعنى دوس على الزرار وارفع الشعار الاهلى والزمالك وهتولع نار , اقوى ديربى عربى وافريقى والمصنف الثامن على مستوى العالم ديربى ال 180 مليون مشاهد ده اخر احصاء لمتابعى نهائى الكاس بين الفريقين فى موسم 2007 واللى انتهى بفوز النادى الاهلى 4/3 بعد وقت اضافى , الاهلى اعرق الأنديه العربية والافريقية والذى تأسس فى العام 1907 ونادى الزمالك المنافس الاخوى للنادى الاهلى واللى اتاسس 1911 اكثر من 100 سنة تنافس وربنا يدينا ويديكوا طول العمر ونشوف الاجمل والاحلى والامتع من الاهلى والزمالك .
7– جالاطا سراى & فناربخشه
ديربى هويام والسلطان سليمان انه ديربى اسطنبول من اقوى واعنف الديربيات حول العالم التنافس بينهم ممتد مش بس لكره القدم لكن لبقيه الالعاب السله واليد كمان المنافسه وصلت لفارق لقب وحيد بينهم يتفوق بيه جلطه عن بخشه بععد ألقاب الدورى التركى .
6– فلامنجو & فلومينسى
ديربى المتعه والسحر ديربى السامبا البرازيل يعنى تسكت ساكت على راى فؤاد المهندس ديربى "فلافلو" الذى يطلق على مباراة فريقى فلامنجو وفلومينسى البرازيلين الذى يشهد حضور جماهير بحوالى 95 ألف متفرج بملعب "ماركانا" الدولى، الذى بدأ منذ عام 1911، بعدما قام لاعبو فلومينسى بترك الفريق والرحيل إلى فلامنجو.ويتفوق فريق فلامنجو بعدد الألقاب التى توّج بها على المستوى الدورى البرازيلى ب32 لقبا بفارق لقب وحيد عن فلومينسى.
5– ليفربول & مانشستر يونايتد
مباريات ليفربول ومانشستر يونايتد من أقوى المباريات فى تاريخ كرة القدم الإنجيلزية، كلاهما يمثلان الجنوب الشرقى للإنجلترا والمسافة بينهما لا تتخطى مش اكتر من ساعه يعنى مسافه ما تطلع من شارع الهرم لشارع الهرم برده .ويتفوق الشياطين الحمر على الريدز بعدد بطولات البريميرليج التى حصدها الأول فى 20 مناسبة، بينما يتفوق الأخير فى عدد الأكثر تتويجا على المستوى الأوروبى بخمسة ألقاب.
4– ميلان & الانتر
إنه الديربي الإيطالي ديلا ماندييلا ديربى الشياكه والاناقه والبيتزا والاسباجتى ، وليه لا وهو يجمع عملاقين كبيرين على الصعيد العالمي وليس إيطاليا فقط، فالفريقان يمتلكان تاريخاً مليئاً بالأساطير، التقاليد، الألقاب والمجد الذين لا تمتلكهم القليل من الأندية بالعالم، الصراع التاريخي إبتدء منذ أكثر من مئة وسنتين حيث إنفصلت مجموعة من اللاعبين عن نادي الميلان بعد استيائهم من قوانين النادي وقتها التي كانت تمنع لعب غير الايطاليين في صفوفه ليشكلوا فريق الإنتر ومنذ ذلك الوقت والفريقان يتصارعان على مختلف أنواع الألقاب محليةً كانت أو خارجية.
3– بوكاجونيور & ريفربلات
ديييجو ارماندوا مارادونا احنا دلوقتى فى منطقه المعلم اللى منه بنتعلم نسكت وهو موجود ما نرضى نتنفس , بوكا ده يا جماعه النادى المحبب لمارادونا منافسه اللدود ريفر مش بهنيه على حاجه عامل زى الشوكه فى الدورى الارجنتينى الديربى دة يا جماعه باختصار بيمثل صراع الطبقات داخل الارجنتين بوكا يمثل الطبقات الشعبيه داخل الارجنتين وريفر بلات هو نادى ولاد الزوات هناك والطبقه الراقيه وعلى فكره ده الديربى الاهم فى امريكا اللاتينيه .
2- سيلتك & جلاسكو رينجرز
الاولد فيرم ديربي يتعدى كل الأطراف الرياضية،الطبقية ،التاريخية والإجتماعية ليصل إلى الصراع الديني والقومي التاريخي عندنا السلتكس صاحب القاعدة الجماهيرية المؤلفة بمعظمها من الكاتوليك ذوي الأصول الايرلندية ومن جهةٍ أخرى فإن الرنجرس يمثل السكتلنديين البروتستانت وهو الشيء الواضح على شعارات الناديين ، وهذا الصراع يجعل من مباراة الديربي هذه تعتبر أحد الأشرس على صعيد حماس الجماهير المحلية لها في العالم يعنى مثلا سنه 72 قتل اكثر من 60 مشجع بعد نهايه مباراه الفريقين نتيجه لاشتباكات بين الجمهورين سيلتك وجلاسكو رينجرز الفريقان الأنجح فى تاريخ الكرة الإسكتلندية والأكثر تتويجا بالألقاب، حيث حققا الدورى 98 مرة و41 كأس إسكتلندا و68 سوبرا.ويتفوق فريق رينجرز فى المواجهات ب159 مباراة مقابل 144 فوزا للسيلتك
* كلاسيكو الارض … ريال مدريد & برشلونه
برشلونة وريال مدريد كلاسيكو الأرض كما يطلق عليها مشجعو كرة القدم فى العالم، وفى أبعاد سياسية لديربى بلد الماتدور، حيث يمثل فريق ريال مدريد السلطة الإسبانبة، بينما يمثل برشلونة إقليم كتالونيا الذى يطالب بالانفصال عن البلاد.الديربى دة ياجماعه هو الاغلى على مستوى العالم يعنى اللهم لا حسد كده قدرت اسعار اللاعيبه فى اخر مباره بين الفريقين طبقا لعقودهم وحقرق الرعايه ليهم مليار و 300 مليون دولار كل دى اصفار يا جدعان ناس بتشتغل بجد عشان توصل لده مش كسبوه من سيربح المليار على فكره .
فى النهايه اتمنى اكون قدرت اوصل معلومات جديده عن كوكب الكره واقوى الديربيات على سطح الكوكب واستنونى بكره فى مقالنا الجديد وانشاء الله ينال رضاكم .