يا ظهري المسوس

مال عظمك ولى راشي
السوس ينهش فيه بلا ما يقيس
كلامك ولى مسوس
يرمي بالخناشي
تضرب خماسي ف سداسي
ونت ماشي
منين ف وجهي تردت لبيبان
وكلبي شعلت فيه النيران
دارو فيا دروبا وزناقي
طرزوا بالجوهر والعقيق حماقي
بلا عساس من عيون الغاشي
منين تخلط فيا العقل مع قلة العقل
وظهري بالمحنى اتحنى
وعلى عذابو خاطري اتهنى
كنت به نتعنى
عضوك…بعمود قاسي ذبحوك
زلزلوك وفي جلدي مسامر كد لوتاد
وهادي سنين وانا نتسنى
وليت ف يامي نتعزى
قلت مالي ما نولي كيف لحباب
حتى انا نخرج نستبرى
نغسل وجهي بالما المصفي
يا ظهري مالك
بحال لهبيل محنزز
تغني بزز
تفرح بزز
تشطح بزز
وعيون الناشطة
على غيرك تغمز
يا ظهري يا الراكب على عمري
عضني فمي
سال دمي
ياكما كبرات فيك الحدبة
وفوق سريرك حلالها تنعس
تتحير تدير عليك جدبة
عيساوية
بالنار حامية
وجهي مدفون ف وسادة
بالظلام مغشي
تخليها مندبة
يا ظهري مالك وليت عوج
وما بقيت مكاد كيف الخوت تفوج
الناس تمشي لقدام
ونت غادي بالخطوة اللور
وخاطرك فكعان
زهرك بالحسرة مفرز
ساط الريح عليه ومات البارح
وانا اليوم نبدا
بين ظهري الزغبي مايهمني غياب
افرحي يا يامي
راه اليوم قدامي
جاي من دفا لحباب
ما يحني ظهري
ما يسد عليا باب
رآك ف دمي جمرة شاعلة
تفيق الراكد فيا بلا عتاب
افرحي أسعدي
كن قدامي لا ورا ظهري
هادي يدي ليك ومعاها زهري
نديرو ما دارت لحمامة لغراب
ناخدو حقنا الي تخاد
نردو سعدنا نغطيواه بشلا تواب
نرجعو سعدنا الي غاب