قصيدة ... قداح الهجر

دخيل النار من طعنات قلب بالهوى مفجوج
نزف دم الخفوق بروح تشكي من مجافيها
غرامٍ في حنايا الروح عن عين العذول يلوج
ويشرب من قداح الهجر ما تعرف بصافيها
غدر بي وقتي الشاين وعقب بالشعور فلوج
مشاعر مالقت من بردها منهو يدفيها
تعثر بي حصان الحظ جامح ما علته سروج
وطحت الطيحة اللي ما لقت طبٍ(ن)ويشفيها
وحجيت بزمانٍ(ن)مافرض فوق العباد حجوج
عرضت أحلام عمري ما لقت بالسوق شاريها
وتهت بالعالم النسيان فاقد حلمي المدهوج
أراقب طلعت الفجر البعيد أبطت حراويها
على ضفة بحر مالح شرابه بالطعم ممجوج
وحطمت المراكب بعد ما نزلت سواريها
نسج أرواحنا وأيامنا ما بينت منتوج
حياة نعيشها والله يعلم ويش تاليها
على الله أشكي أوجاعي وعنده للكروب فروج
كريمٍ(ن)معتني برواحنا سبحان محييها