مواقف !

حاجات تغيظ .. حاجات تضايق
حاجات تدوخ عقل الفايق
ع اللى بيحصل أنا مش طايق
م اللى بيحصل أنا مذهول
=-=-=-=-=-=-=-=-=
تلاقى أخ بيقتل أخوه
تلاقى إبن بيدبح أبوه
وقلب يصرخ يا ناس يا هوه
ع اللى بيجرى مين مسئول
=-=-=-=-=-=-=-=-=-=
هوانا بقى كله مآسى
زمانا بقى دايما قاسى
أشيله على عينى وراسى
ألاقى قسوة قلبه تطول
=-=-=-=-=-=-=-=
زمان ده كان مية المية
اللقمة فيه تكفى المية
نسينا ليه الحنية
ولسانا بقى بالكدب يقول
=-=-=-=-=-=-=-=-=
وف الشوارع تشوف مواقف
تخلى شعرك يا عينى واقف
وع الرصيف قاعد وواقف
عاطلين وبالهم مش مشغول
=-=-=-=-=-=-=-=-=-=
خلاص يا ناس أنا قلبى خلاص
يتمنى يملا الحب الناس
ونعيش ف دنيا من الإخلاص
وكل صاحب حلم ينول
=-=-=-=-=-=-=-=
يا رب إدعوا يفوز الدين
يا رب إدعوا وقولوا آمين
الفكر يرجع تانى رزين
ولا يغوناش هوى العقول
=-=-=-=-=-=-=-=-=
للتواصل مع الكاتب .. يرجى الدخول على هذا الرابط :
http://tiny.cc/yz7myw