صديق البحر

كنت صديق للبحر لقيته.......زي الناس أصبح غدار
كنت أشكي له قساوه الدنيا......وأأنس بيه وأحكي الأسرار
ألقي ف لونه النفس الهاديه.....وبميته ..تنطفي النار
نار الحقد ونار الغل......... ونغسل بيه ذنوب الأشرار
كان يضحك لي ..وكان يسمعني.....وكان يمنعني.....ونعم الجار
علي رملته ألقي الحنيه.........وبين أمواجه الحضن البار
جنب البحر الناس تتساوي.....الغلبان ويا الجبار
والألقاب عنده بتتهاوي .......وما تفرقشي أسد..وحمار
كنت صديق للبحر ولكن.......فجأة لقيته من الخاينين
فاكر يوم أنا رحت أشكي له....ما سمعنيش.. ما لقيتش حنين
قلت لموجه العالي إحضني.....كان ح يا كلني ابن الملاعين
قمت صرخت وقلت يا عالم....حتي البحر..إتعلم فين
قال صياد علي صخره كبيره.....في القرآن إسمع آيتين
(ظهر الفساد في البر والبحر بما كسبت أيدي الناس)
قلت خلاص ده البحر إتعلم.....من أفعال البني آدمين
يسمع منهم..ما بيتكلم...........جاتله العدوي ف غمضه عين
قال إشمعني الناس دي بتظلم.....فين النخوه وفين الدين
ما في أخلاق..وقيم وحضاره.....ولا ناس بتقول لك..آسفين
ما بقاش ليه صديق ف الدنيا.....غير الوحده وقلب حزين
بعد ما خانني البحر وناسه.........ح اشكي ..وأحكي ..وأبكي لمين
هو سؤال عاوزين له إجابه........وقولوا الحق يا مستمعين
مين غلطان..البحر وموجه.........ولا نقول ..البني آدمين
د.هاني بخاري
استشارة جراحة
شاعر اطباء الإسكندرية