مش وطن

أنا بلدي غريبة بأكوانها
عالم متلخبطة ألوانها
أنا بلدي كات مرسى ومينا
بتجمع أحلامنا وخطاوينا
أنا بلدي كات بنوتة بضفاير
الضحكة ع الغصن بتتمايل
أنابلدي كات نيل بيعدي
أنابلدي كات بلسم روح
بيطيب في جروح البوح
أنابلدي بقا إسمها كانت
مرسومة ف تابلوه أوجاع
متيتمة روحنا ف خطاويها
وبتشرب دمنا إجماع
صفَّتِنَا ف لحظة أمانينا
وصفََتنا وبكل خِداع
أنا بلدي ترابها بيتمنى
يبدل لون الدم الساري
ويزرع م الورد جناين
ويلف الحب بوكيه
أنا بلدي بتوزعها مدافن
وتصَدر أحلامنا لفوق
مش قادرة تحقق أحلامنا
ف تموت ف عنينا الشوق
أنا بلدي باعتنا في ماتشاتها
وإشترت اللاعيبة بأرواحنا
هات جون في شِباك أوجاعنا
صقفة ..
وهيصة ..
وزيطة قوي
القلب أهو عيل مات
مش فارق أموت أو أروح
أنا عايش أطلع ف الروح
زنازين العمر وبتفوح
ميت مسجون ماشافوني
مش لاقي اللقمة عروني
وكسوني الدم إزار
أناعايش وكأني ف بار
سكران يطوح ف مدار
بيدوس
جتت البني آدمين
أنا وطني كان حطين
صلب صلاح الدين
وعاش الجاني بأوجاعنا
أنا وطني كان
ياسمين
نبِّت صبار
أنا وطني كان
حر
نبتّها حِصار
فرق يازمان أسامينا
جمعها ف لوح وإسوار
وإفرشها ف حدوتة ل بكره
ع حِفنة جديدة م الشهدا
ده تراب
وبيرجع ل تراب !!
أيه ذنب العيل يا إخوانا
يموت ف بداية المشوار !!