ملخص كلام بيدبأ

قول للناس تتمنى وتتهني و بزيادة
والحُزن ما يبقاش... العَّادة
مع شاي الصُبحية
وتفرَّق بين البليَّاتشُو
وبتاع الشُو
وبتاع الطَّعميَّة
بعضْ الظَّن حرام
والبعض التاني ....عبادة
جوا القلب غَرام
بيطَوحنِى علَّى ال... سجادة
لكل قيادة.....قضية
ولكل قضية قيادة
بيصَّنعها الباب العالي
العَّارف بالله مولانا الإعلام
بلسانه المشقوق كالعادة
بيخلى الوَّطَنية كَلَّام
وبَلاَّدة وبَلاَّهة ثورية
يبقى نجمَّع كل جُيوشنا
.......ونعُوشنا
وقبل ما نقتل حدْ
نقرا له الفاتحة بجد
ونحط الخطة .....
ونشرب دمه على الطَّبلية
مش هاين ع الحَبيب يكرهك
ولا قادر يحبك علي كيفه
واقف علي سلمِّك
متسمَّر بيتكرَّر نشاز
رافضْ النوتة الإزاز
تِعزِف على خُوفه
على كيفى... ومن خوفى
دخلتْ جوا الكهربا
وعَملتْ قلبي.... مَصطَبة
أخدت النهار مُلهمِى
وناس الشَّوارع ...مكتبة
مُلخص كَلام بيدبا
الدمْ.... دمْ
لا بينزرع ....ولا بيْنطبع
ولا بينصرف ولا.... بيُرتَجع
ولا ألوانه مترتبة
الدم فارق بين الخسيس والجَدَّع
و لا عُمره كان بيضَحَّك
ولا... بينخدع
الدم واضح صريح
مايعرفش يتمحَّك
بيواجه وبيعافر
وبيجيب من الأخر
وبيكره الكر...كبة
مُلخص كلام بيدبا
عُود الخيَّال مَحنِّى
وطَعم الحنين رَاكع
الكُره دابحنى
والحب..... بيتراجع
قولى عنى كان حد
ورافض يُستنسَخ
فارس من غير أتباع
م الحب.... بيدروخ
رفع الشنطة الفاضية
وسافر لحياته الماضية
ولوَّح بإيديه
عمل اللى عليه
والباقى.... على الله
أشرف عبد العزيز مشرف
26/5/2011