دعارة حلال

دعونى اخبركم أن المجتمعات العربية ما هى الا مجتمعات عارهه تدعى الشرف وتجد الاغبياء
الذين يؤيدونها ..
الدليل على ذلك هو ( مواقع الزواج ) ...
من المفترض ان هذه المواقع الهدف الاساسى منها هو ايجاد شريك الحياة المناسب والذى عجز
كلا من الطرفين عن ايجاده ف الحياة الواقعية فيصبح السبيل الوحيد هو تلك المواقع .
فى الفترة الاخيرة انتشرت المواقع دى بشكل مرعب جدا .. فى البداية اتقال ان السبب فى وجود مثل
تلك المواقع هو سوء الحالة الاجتماعية الى ادى بدوره الى انتشار العنوسة فى مصر والوطن العربى
.. لكن اذا كان ده السبب الحقيقى فعلا .. ايه الى هيتغير فى المواقع عن الحياة الواقعية ؟!!
بعض الاراء قالت ان البنات الى بتبقى موجوده على المواقع دى بيبقى فاتها ( قطر الجواز ) وبالتالى بتقبل
بأقل امكانيات متاحة .
لكن ايضا لو كان ده السبب .. ف ليه البنات دى متقبلش بأى حد متقدملها تانى وامكانياته بسيطة ؟!!
#ملحوظة : البنات الى مش متجوزة او الى بيطلق عليها لقب #عانس مش معناها ان مش بيتقدملها حد
لا اطلاقا .. بالفعل حالات كتيرة جدا ناس بتتقدملها بس بتبقى دون المستوى او بمعنى تانى ( مش ده فتى
أحلامها المطلوب ) أو ممكن يكون موجود بعض المشاكل أو غيرها من الاسباب .
معنى ذلك ان الاسباب دى غير كافية او منطقية ومينفعش نتقبلها ونسكت عن ظاهرة زى دى .
علشان كده قررت انى أدخل العالم ده وأعرف ايه الى فيه .. بالفعل الاكونت على الموقع اخد دقائق
وجهز .. وانهالت الطلبات والرسائل الى كان نصها ( اهلا فلانه شايفك مناسبة جدا ليا وده رقم تليفونى
وكلمينى ) ؟!!
والبعض الاخر كانت رسائله محترمة جدا وكان نصها ( اهلا فلانة انا فلان من كذا ولاقيت فيكى فتاة احلامى
عندى شقة فى المكان الفلانى وده رقم تليفونى وهديكى الى انتى عايزاة ) ؟!!
الى لفت انتباهى فعلا هى كمية الناس الى موجودة على المواقع دى والى كان معظمهم فئتهم العمرية تتراوح
بين 30 : 50 سنة .. طبعا فى المواقع دى موجود ( اوبشن ) انك تختار السن المطلوب لكن المفجاة ان الناس
دى بتكون كاتبة المعلومات غلط ؟!!
ودى اول حاجه تأكد ان المواقع دى ما هى الا ( بيوت دعارة ) كبيرة مرخصة ومعترف بها وتحت مسمى
الزواج و ( حلال ) ؟!!
شئ تانى لفت انتباهى وهو ان فى ناس كتير اوى اصحاب مؤهلات عالية جدا ومستواهم المادى عالى جدا
وايضا مستواهم الاجتماعى يعنى اكيد مش محتاجين مواقع زى دى علشان يتجوزوا .
شيء تانى عرفنى فعلا ان المواقع دى والى معظمها من المفترض انها مواقع جواز اسلامية ما هى الا #زنا
متغطى وشبكات دعارة عالمية ..
رسالة جتلى من شخص بيطلب رقمى وصورتى ولما سألته انت موجود ع الموقع ده ليه رغم ان مستواك
يخليك تشوار يجيلك ألف بنت ؟!
كانت اجابتة صادمة .. ( انا متجوز وعندى اولاد بس مش مرتاح مع مراتى وداخل هنا علشان الاقى واحدة
تعمل علاقة جنسية معايا مقابل الى تطلبة ) ؟!!
سألته اذا كانت المواقع دى فعلا للجواز ؟
اجابتة .. ( جواز ايه مفيش بنت محترمة هتدخل هنا وواحد زيى مش محتاج مفيش حد بيدخل المواقع الى زى
دى الا علشان #المتعة او زواج المسيار للعرب ) .. !!
أستاذى إبراهيم عطية صاحب قضية حجب المواقع الاباحية بتوكيل من الرئيس المخلوع محمد مرسى عام 2013 .. حضرتك تعبت نفسك وفكرت فى حاجة زى دى طبعا مشكور عليها ..
لكن اذا كان مبررك فى غلق تلك المواقع هو ان الشريعة الإسلامية بنصوص القرآن الكريم وجميع الشرائع السماوية جاءت لتسمو بالإنسان إلى مستوى كرامته المنشودة، وأن المواقع التي تنشر الرذيلة ما زالت مستمرة بتأثيرها على الشباب والأطفال على حد سواء
ليه مفكرتش تعمل ع الاقل رقابة على المواقع الى زى دى ولا علشان مكتوب عليها ( مواقع زواج اسلامية ) ؟!!
أيها الشعب المتدين بطبعه .. أحب اقولك ان اول خطوة فى حل المشكلة هو الاعتراف بها .. اعترف انك لا متدين
ولا تعرف يعنى ايه تدين .. اعترف انك بتعمل الغلط بس بمسمى متغطى اسلامى ..
المواقع دى التعامل معها مش هيبقى بغلقها نهائيا .. الحل الصحيح هو الاعتراف ان مواقع الزواج
الى منتشرة بشكل كبير هى عبارة عن موطن للعاهرات و للشواذ وللعلاقات الجنسية الالكترونية
او لزواج المسيار و العرفى او غيرة من انواع الزواج المحرم .
من الاخر .. بطل تبرر لنفسك دخول مواقع زى دى بحجة انك بتدور ع عروسة او انك بتدورى ع عريس
وفى الاخر بتنتهى بعلاقات جنسية الكترونية احيانا تؤدى الى الحمل وفقد العذرية .