بالصور .. ثورة الجياع بدأت من أمام مكتب عصام شرف!

رسالة من مواطن إلى والى مصر سيدنا ومولانا عصام بن شرف.. أطال الله فى حكومته .. يا حاشية سيدنا الوالى أليس فيكم رجل رشيد ليقول لمولانا أن أحد الرعايا له طلب بسيط .. عايز كشك يؤكل به أولاده .. وإذا لم تستجيبوا والله إنى لأختصمكم أمام رب العالمين يوم القيامة..
تصوير: محمد لطفى

هذه رسالة غير تقليدية من مئات الرسائل التى يكتبها مواطنون فقراء ويرسلونها للدكتور عصام شرف على أمل أن يصلهم رد على طريقة الرئيس جمال عبد الناصر الذى كان يرد على كل الرسائل التى ترد إليه .. عشرات المواطنين يفدون يومياً إلى ساحة مجلس الوزارء لعرض شكواهم وهم لا يعبرون عن مطالب فئوية أو يطالبون برفع المرتبات وإنما هم فى الأصل يعيشون تحت خط الفقر بمراحل عديدة ..
من ضمن هؤلاء مواطن يدعى جمال صابر عبد ربه .. إنسان مشرد بلا مأوى ولا عمل ولا أهل وقد قرر أن يسكن فى الشارع بجوار مكتب الدكتور عصام شرف هو وزوجته وابنته أمام مقر مجلس الوزارء .. هذا المواطن رغم بساطته إلا أن له نظرة خاصة فى الحياة تعالوا نسمعها منه
أنت أصلا كنت ساكن فين فى الأول قبل أن تتشرد بالشكل ده؟
أنا من الناس اللى شربوا الويل وداقوا القرف فى كاسات وعمرى ما حسيت إنى عايش .. وبعدين أنا مقطوع من شجرة وكنت ساكن فى غرفة فى الكيلو أربعة ونص فى عزبة الهجانة وصاحب البيت طردنى علشان تأخرت فى الإيجار وبعدين سكنت تحت كوبرى ألماظة فقامت الشرطة طردتنى أنا وبنتى وزوجتى وتشردت فى العيشة حتى الشارع لم يتحملنى وتخيل لما تكون عايز تنام أنت وعيالك ومش لاقى حتة والدنيا كلها طردتك..
طيب وعملت إيه فى ظروفك السوداء دى؟
بعد ما طردونى من تحت الكوبرى وقالولى ممنوع .. رحت ماسبيرو علشان أعتصم مع بتوع مدينة السلام فقالولى إنت مش تبعنا وطردونى من الشارع وفى النهاية قلت مافيش غير الدكتور عصام شرف أروح أنام تحت مكتبه يمكن يحس بى ..
وهل حس بيك؟
كل يوم يمر موكبه من هنا لكنه هيبص لمين ولا مين أنا واحد من ضمن ملايين .. إشمعنا أنا يعنى.. لكن المشلكة إن الدنيا ما إتغيرتش..
يعنى إيه ما تغيرتش؟
يعنى مجلس الوزارء زى ما هو وكل اللى تغير عصام شرف وباقى الناس اللى جوه من بتوع أحمد نظيف ولسه عايشين بروح زمان وبالفساد وبالوسايط..
إنت نزلت التحرير قبل كده؟
طبعا ما يغركش إن هدومى متبهدلة .. أنا من ثوار 25 يناير! أنا نزلت فى أول يوم وقلت يسقط النظام وكنت أول واحد يقول تحيا ثورة الجعانين! وقعدت كتير فى الميدان ونمت فيه.. لكن المشكلة إن البلد زى ما هى..
انت اتعلمت؟
لأ طبعا ومنين أتعلم أنا راجل أمى بس مش جاهل وشايف الدنيا وحاولت كتير أدور على شغلانة بس الدنيا صعبة أصل أنا راجل شيال فى الفاعل يعنى أشيل شوية رملة أو شوية زلط .. لكن السوق نام وكانت النتيجة إنى جعت ..
طيب إيه قولك فى الناس الأغنياء اللى بتشوفهم كل يوم وهم نازلين من جاردن سيتى؟
فيه ست كل يوم بتمر من الشارع وماسكة فى إيدها كلب فقلت لها يا ست هانم إيه رأيك تجرينى مكان الكلب ده! هى دى الحقيقة فيه ناس كتير الكلاب عايشين أحسن منهم! يعنى الكلاب تركب الملاكى وإحنا نتشعلق فى الأتوبيسات ..
طيب وعندما قامت الثورة هل شعرت إن الدنيا ممكن تحلو معاك وإن حد ممكن يسمعك؟
طبعا لأ .. بس أنا ذنبى فى رقبة عصام شرف وفى رقبة الثورة وفى رقبتك إنت وفى رقبة الإعلام اللى لازم يشوف مشكلتنا لإننا تعبنا ومش لاقيين ناكل ولا نشرب ولا نسكن وآدى حياتى..

وبخلاف هذا المواطن يتجمع الآن العشرات من المواطنين من ذوى الاحتياجات الخاصة أمام مجلس الوزارء باحثين عن وظيفة أومصدر دخل وقد حصلوا على وعود كثيرة من الوزارت ولكن دون جدوى كما أن بعضهم تم تعيينهم بالفعل فى بعض الشركات مثل شركة عز الدخيلة ولكن أحمد عز لم ينصفهم وقطع عنهم المرتبات حيث اعتبرها صدقة.. كما يتواجد أيضا مواطنون أصحاب مظالم وشكاوى منهم مواطن يدعى سيد عبد الرحمن جاء من قنا من اجل أن يثبت أنه حى بعد أن ظلمته زوجته وأخرجت له شهادة وفاة بتواطىء من نائب بمجلس الشعب عن الحزب الوطنى وشاب آخر جاء ليطلب كشك من الحكومة وغيره وغيره فالمسلسل عبارة عن عرض مستمر وكل يوم هناك وجوه جديدة من أنصار ثورة الجياع ..