بقية كلام القلم الأخضر عن الأصحاب

تلخيص لما سبق : أمين شاعر ومهندس كمبيوتر يراوده الشعر عن نفسه فيأبي لضغوط العمل , لكنه أحيانا يستجيب , ويعجز عن مقاومة النداء المغوي , فيأتي بغواية أشد لمن يقرؤه .
يقعد سعيد خجلان
ويبتدي يشتغل
ييجي النسيم بالريحة والألوان
والاسم .. والعنوان
ويبتدي الشاعر يسيب المكان
يشم غطيان القلل .. ريحة اللمون
عطر الصباح القديم
يشرب .. يقوم عطشان
ويفتح الثلاجة في المكتب
يواجهه شباك الجيران
شباك قديم وبيوت حجرها ندي
بتاخده بالأحضان
يقفل بيبان التلج
يرضع من القلة بعطش سرمدي
ونسمة المغربية
ييجي حنانها الشجي
بالريحة والألوان .. وحتي الصوت
صوت العيال واليمام
وأمين هناك في الإمام
إيده هنا ع الريموت
ولد صموت مع بنت بضفيرة
بيلعبوا اللعب القديم
علي صوت وابور بيخدر الأبدان
أمين : ازاي خرجت من الحموم عريان؟
م الشاشة وسط الناس
وآدي مدير الشركة فايت كمان !
*
والشيخ كشيك في الأزهر الضحكي
ساند بضهره ع العمود يحكي
وكلامه هذيان بس له معني
حد وخميس في رواقه يجمعنا
يبل ايده ميه ما اعرف منين
ويرش من ماء الحياة ع العود
روحه الخفية تنتشر في الجو
الشيخ يمد الإيد
يقطف ريحانة بالندي
لقلب كل مريد
ويقول كلام في الشعر والآداب
اسمع كأني أزهري مولود
عند العمود ..
أغنية بهاء عن قعدة الوراق
قالوا كشيك اختفي
قالوا تلاشي جوه أوضته وطار
زي المجاذيب الكبار
كانوا العيال بيعيطوا
وعيون مراته كأنها عارفة
شاورت علي الغرفة
وقالت استنوه زمانه جي
وبعد حبة صغار
سمعنا قولة : حي !
وع السرير اتجسد الشيخ كشيك
مادخلش من باب أو ستار
وقال لي هات ما لديك
الشاي حضر .. الشيخ تبخر بخار
ونزل علي سطح النباتات ندي
وسمعنا صوته يقول :
تعالوا ع السطح احنا صيف
والجو ع السطح الليلادي كيف
حسيت حضور النيل
بكيت
وجهاد ومي نسمتين نيلي
كشيك مزاجه انسجم
وقال هاتولي قلم
املا كشاكيلي
وبص لي وقال لي :
العود معاك؟
تبقي انت صاحب البيت
وانا الليلادي ضيف ونفسي اسمعك
غنيت وقلبي يدق دقة عود :
الشيخ كشيك فاني لكن موجود
حاني لكن نمرود
تاني لكم بيعود
باني لكم عنقود
من كل نجمات السما
الشيخ كشيك فاتح لكم غية
حاضن سما بنجمات في قصرية
وكل نجمة لون
وكل حاضر طيف
وكل غايب حي !
الشيخ كشيك بيعيد بناء الكون
بخلية واحدة من جسد شاعر
و ف وسط ما باغني عطشت لناي
لقيت صينية شاي
داخلة وفيها ريحان علي نعناع
طلبت مية م اللي تسقي الريحان
مرشوش ندي انضميت الي البستان
لما شربنا الشاي
الكركديه كان جاي
والشيخ كشيك كان هام
من ريحة النباتات
قام اتنطر قال لي
( والا ابويا صلاح مانيش فاكر )
شفت القلم لاخضر جميل ازاي؟