مرة واحد صعيدى

منذ العصر الحجرى ووجود الإنسان الأول والتريقة على الصعايدة شغالة على ودنه .. مش مهم اللى بيتريق ده منين .. المهم انه يبدأ النكتة بواحد بلديتنا وفى الاخر تسأله هو انت منين ؟ يرد بكل ثقة انا من قبلى –عادى جدا -
وطبعا كلنا مرت علينا اشكال وألوان من نكت الصعايدة لكن اول امبارح بقى مت على نفسى من الضحك لما قرأت اللى اخويا كتبه على اساس انه نكتة .. بس انا بيتهيألى انها قصيدة ، على ايامنا كانت نكتة الصعايدة كبيرها تكون " مرة البوليس عمل كبسة على الصعايدة واللى مش صعيدى كانوا بيسيبوه .. فالضابط بيسأل كل واحد على اسم " الجردل " ولو قال " دردل " يمسكه علشان صعيدى .. وفى واحد واقف فى الاخر خايف قوى وبيقول اعمل ايه اعمل ايه .. والضابط أول ما سأله قال : جردل .. فقال له ايوه انت مش صعيدى أسمك ايه ؟ قاله محسوبك دابر " ..
ده كان ايام نكت الزمن الجميل .. لكن تعالى بقى شوف شباب اليومين دول بيتريقوا ازاى..
ابنى الحبيب صميدة
انا عارفة انك مبتعرفش تقرا بسرعة
عشان كده بكتبلك الجواب ده بالراحة خالص
احنا كلاتنا كويسين جوى جوى
ابوك خلانا نعزل من الدار عشان مش عايز اى حاجة تفكره بالسنين اللى فاتت
انا مش هجدر ابعتلك العنوان لانى معرفهوش من اساسه , اصل الناس اللى كانوا ساكنين جبلنا اخدوا اليفط اللى مكتوب عليها اسم الشارع ورقم العمارة ولزجوها على بيتهم الجديد, بس المكان هنا جميل جوى تخيل ممطرتش غير مرتين بس فى الاسبوع كلاته .. مرة تلات تيام ومرة اربع تيام .. واخوك جاب عربية جديدة بدل اللى وجعت فى الترعة وروحنا بيها عند عمتك بس الواد الغبى المسطول اخوك خرج وجفل على المفاتيح وفضلنا احنا وابوك محبوسين فى العربية لحد ما جه جدع ابن حلال كسر الجزاز وطلعنا ، هي دى كل اخبارنا ويارب تكون بخير وربنا يديم المعروف دايما .
ملحوظة:
انا كنت هبعتلك فلوس فى الجواب ونسيت وجفلت الظرف قبل ما احطهم...