جربت تروح برج القاهرة ؟!

الجو اليومين دول جميل فعلاً .. وأجمل فسحة ممكن تخطفها بسرعة هي زيارة برج القاهرة في الجزيرة .
تصوير : محمد لطفي
طبعا فيه ناس كثيرة زارت البرج قبل التجديد .. لكنها أكيد ستفاجأ بالنظافة الفائقة في شارع الدخول للبرج بعد التجديد ، لكن الخبر غير السار هو أن رسم دخول المصريين كان قبل التجديد 3 جنيهات ولكن الأن أصبح 20 جنيها للمصريين و 65 جنيهاً للأجانب ، وطبعاً هذه الزيادة هدفها تعويض تكاليف التجديد والتي وصلت لحوالي 15 مليون جنيه واستغرق سنتين ، حيث تم ترميم خرسانة البرج و تطوير المصعد المؤدي للبانوراما وتطوير المدخل و المطاعم العلوية واٍنشاء سلم للطوارئ وعمل اٍضاءة خارجية بتكنولوجيا موفرة للطاقة مع اٍمكانية التحكم فيها .
عدد الزائرين اللي ستجده في البانوراما لن تتخيله .. ووقتها ستشعر أن كل الناس قررت فجأة تتفسح في البرج ، وهذا طبيعي لإن الجو فوق رائع في هذا الوقت من السنة .. و أعمل حسابك في كام جنيه فضة حتى تستطيع تشغيل المنظار اللي بيشتغل 30 ثانية لكل عملة فضية .. و طبعا مش هتلحق تتفرج على التلفزيون و الأهرامات و جاردن سيتي و النادي الأهلي و مبنى وزارة الخارجية و مصر كلها بجنيه واحد بس .
و لو كنت من محبي التصوير في البرج فسعر الصورة الفورية هناك 10 جنيهات .. ودي طبعا ليها أكثر من ميزة لأن العدسة المستخدمة في التصوير مطورة بشكل يجعل البرج واضحاً بشكل كامل في الصورة .
و اذا شعرت بالجوع ستكون عندك 4 اختيارات حسب امكانياتك .. أرخصهم " فيلا الزمالك " المطعم الموجود أسفل البرج و " المينيمم تشارج " فيه 100 جنيه و تقدر تختار اللي انت عاوزه ، و ممكن تختار نظام الوجبة اللي هتكلفك 80 جنيهاً للفرد الواحد و هتكون شاملة " السلطة – الشوربة – الوجبة الرئيسية – الحلو "
و نفس الوجبة بتقدم في مطاعم ال vip و المطعم الدوار بثمن 200 جنيه للفرد ، و تذكرة دخول 20 جنيهاً للمطعم ، أما لو حبيت تناولها في مطعم sky garden فستكلفك 120 جنيهاً .
واخيرا وقبل ما تخلص الفسحة .. لازم تعرف إن البرج تم بناؤه في سنة 1961 بمبلغ 6 ملايين جنيه كانت أمريكا منحته لمصر لكي تغير موقفها تجاه القضايا العربية ، و رغم حاجة مصر لهذا المبلغ في ذلك الوقت لكن رفض الرئيس جمال عبد الناصر وضع هذه النقود في البنية الأساسية و بنى به البرج ليكون " شوكة عبد الناصر " كما أطلق عليه الأمريكان .