لو ناوى تخطب .. خد بالك من البروفايل !

" هات عنوانك عشان نسأل عليك" جملة شهيرة تعودنا إننا نسمعها فى الافلام لما البنت ربنا يكرمها ويأتى لها عريس الغفلة ..فأبوها يتقمص دور المخبر السرى ويتحرى عن المتهم ..أقصد العريس.
بس الكلام ده كان زمان .. دلوقتى فى زمن النت وشباب الجامعة وبتوع التاتو ..البنت من دول يدخل عليها الشاب ويقرر إنه عايز ييجى يقابل أهلها .. فهى تقوله أعطينى فرصة أفكر وهى ولا بتفكر ولا حاجة ..لكنها تبدأ تعمل تحرياتها بطريقتها الخاصة .
والطريقة يا سيدى تتلخص فى أن بعض الفتيات مؤخرا قمن باستخدام طريقة جديدة لمعرفة كل شىء عن خطيبها الجديد وهى عن طريق " بروفايل " الفيس بوك ..يعنى تلاقى البنت من دول قاعدة ليل ونهار على موقع الفيس بوك و تتابع كل تحديثة صغيرة أو كبيرة يعملها العريس على البروفايل الخاص به .. وطبعا مش هتنسى تتابع صوره اليومية .
دكتور مدحت عبد الهادى مستشار العلاقات الزوجية هو من فجر هذه الكارثة فى إحدى ندواته التى يعقدها بساقية عبد المنعم الصاوى .. وقال إنه غير منطقى تماما ان البنت تحدد مصيرها ومستقبلها عن طريق الفيس بوك لانه اصلا اكيد مش كل ما يظهر على الصفحة الشخصية للفرد يكون حقيقياً .. فالكل يحاول أن يتجمل ويظهر نفسه فى أحسن صورة .
إيه اللى حصل لكن يا بنات مصر .. فين العقل والفطنة والنباهة ، بقى متابعة الحالة المزاجية للشخص عن طريق النت هيحدد مستقبلكم ...هى كلمة أخيرة عايزة اقولها" يقطع النت على النتيت على اللى ينتاتوه " .. ومن فات قديمه تاه !.