أبو تريكة و حسن شحاتة x وسط البلد ب60 جنيهاً !

أبو تريكة و حسن شحاتة واقفين منورين وسط البلد في كثير من محلات بيع فوانيس مضان السنة دي ... و كان من المفروض ينزل معاهم اللاعب محمد جدو و لكن نزوله تأخر شوية
تصوير : محمود شعبان
وطبعا لا ربط اطلاقا بين تأخر نزول فانوس جدو في الأسواق و بين قرارات و قفه عن اللعب محلياً ..و انما السبب الرئيسي هو ان الشركة الصينية اللي بتصنع الفوانيس شعرت بأن فانوس جدو قريب جدا في الشكل من فانوس أبو تريكة فقررت إعادة رسم جدو بشكل أكثر دقة .
فانوس ابوتريكة نزل بأكثر من شكل .. مرة و هو بيشوط الكورة و مرة و هو راكب موتوسيكل ، و الكبير منه يباع بحوالي 60 جنيهاً و الحجم الصغير ب50 جنيهاً و موديلات أبو تريكة كلها بتغني " ابو تريكة يا فنان ... قسم كمان و كمان " .
أما موديلات "حسن شحاتة " فمتنوعة و معظمها و هو شايل كأس الأمم الأفريقية و أسعاره نفس أسعار " ابو تريكة " و أغنيته " حسن شحاتة يا معلم ... خلي الشبكة تتكلم " .. و كده من الواضح ان اغاني وحوى يا وحوي مش هتتغنى السنة دي في فوانيس رمضان إلا من خلال الفوانيس التقليدية واللي قل الاقبال على شرائها في السنين الأخيرة .
و لاحظنا ان كرومبو لسة موجود بس الجديد فيه انه راكب " بيتش باجي " عشان يناسب جو الصيف و المصايف كمان و ثمنه 22 جنيهاً ، وأيضاً هناك عربية فيها واحد و واحدة و البائع بيقول عليهم " عبد الحليم و شادية " وثمن العربية 30 جنيهاً .. و الجديد . السنة دي أيضاً هناك فانوس " جحا و حماره " و ثمنه حوالي 28 جنيهاً.