لو مراتك ضربتك بالقلم ... هتعمل إيه ؟

ماجدة كمال .. زوجة مصرية عادية جداً ممكن تغير حبتين على جوزها ... و تسأله اتأخرت ليه ... كنت فين ... مع مين ؟ دي أسئلة عادية بتكرر كتير في بيوتنا المصرية و في معظم الوقت بتتطور لخناقة
صور : محمود شعبان

ده فعلا اللي حصل بين ماجدة و جوزها ايهاب صلاح مذيع الأخبار بالتلفزيون ... وطبعا الاستاذ ايهاب معجبوش اسلوب ماجدة فتطورت الخناقة لسب و شتائم و مد إيد بين الأثنين ، ووصل الأمر إنها ضربته بالقلم على وشه كسرت له النظارة ... و في اللحظة دي جرى ايهاب على دولابه مش عشان يلم هدومه مثلا و يسيب لها البيت ... أو حتى يرميها هي و هدومها في الشارع و يبعت لها ورقة طلاقها على بيت أهلها ... لكنه جاب الطبنجة و قتلها .
الغريب في طريقة القتل انه فجر راسها بالرصاصة اللي كانت في المسدس ... يعني مصوبش في اي مكان تاني ... و بمنتهى البساطة اتصل بأهلها و أبلغهم بإن عزاء إبنتهم بكرة في عمر مكرم ... وبعيد عن تفاصيل الحادثة دي واللى حصلت من يومين ، نزلنا الشارع وسألنا الناس : هو القتل بقى سهل ؟ و ممكن راجل يقتل مراته عشان ضربته بالقلم ؟!
" طبعا الاختيار من الأول غلط " و هذا كان رأي " أيمن سعيد – موظف " و " أحمد علام – محاسب " و قالا أيضا : لو كانت في بينهم ذرة احترام كان الخلاف وصل لأهلهم من غير شتيمة و ضرب و قلة أدب .. و هو كان أسهل إنه يطلقها من غير ما يضيع مستقبله .
أما " مؤمن محمود – مستشار قانوني " يقول : طبعا من المستحيل زوجتي تتجرأ و تعمل كده مش بس عشان بتحترمنى .. كمان عشان فيه بيننا مودة .. و الأهم الرحمة اللي ربنا قال عليها ، و لو ده فرضاً حصل مش ممكن اقتلها ، وأعتقد ان الراجل ده مر بمرحلة فقدان للعقل ولو للحظات ، و ربنا يعينه على اللي عمله في نفسه .
وأضاف " شنودة قزمان – محامي " : رغم إني مسيحي و لا يوجد عندنا طلاق ، إلا أن القتل أبداً لن يكون حلاً .. فيه انواع كثيرة من العقاب ممكن نعاقب بيها زوجاتنا من غير قتل طبعا .
" محمد عبد الحميد – بائع " و " محمود على – موظف " ممكن فعلا يقتلوا زوجاتهم لو أهانوا رجولتهم .. وقالوا : ممكن فعلا نقتل لو الموضوع جه على رجولتنا .. و العيب على الست من البداية اللي استفزت الراجل و عايرته بأنها بتصرف عليه .
و " محمد خيرى – خريج داسات اسلامية " و معه " حمادة سميح " يقولان : التدين سواء كان اسلامياً او مسيحياً هو اللي بيخلى الناس تخاف من ربنا قبل الأقدام على المصايب دي .. و العيب كمان على تصاريح حمل السلاح اللي بتطلع على الفاضي و المليان .
و أخيرا ... السؤال لحضرتك ... لو مراتك ضربتك بالقلم ... ممكن تموتها !
أرسل تعليقك الأن