بسمة عادل عفيفي مصممة الأزياء الأشهر علي مواقع التواصل الاجتماعي:

»إرادتك هي سر نجاحك»‬ مقولة تؤمن بها مصممة الأزياء بسمة عادل عفيفي والتي رغم دراستها في كلية الآداب الا ان عشقها لمجال تصميم الأزياء ومتابعة أحدث خطوط الموضة العالمية دفعها لخوض هذا المجال واحترافه فأصبحت من مصممي الأزياء الموهوبين اللاتي تحرص معظم السيدات والفتيات علي ارتداء القطع التي تحمل توقيعها.
وتقول »‬عمري 28 سنة ودرست في كلية اداب قسم لغات شرقية وباشتغل مصممة ازياء،وبعد التخرج حاولت اشتغل في مجال دراستي وهو اللغات وترجمتها بس ماحبتش وماقدرتش اعمل حاجه مش لاقيه نفسي فيها وكنت دايماً بدور علي الحاجه اللي الاقي نفسي فيها،وكان حبي للفاشون واختيار الوان مع بعض مختلفه وتنسيق قطع مختلفه مع بعض كان لافت لكل اهلي وأقاربي وحتي اصحابي في الجامعه كانوا دايما يقولولي اني مميزه في اختيار ألوان وتنسيق قطع كتير مختلفه عن بعض وبطريقه غير تقليديه وكان دايما كل اللي حواليا بيأخدوا رأيي في اي لبس بيشتروه وبيعتمدوا عليه كتير،ووقتي كله وفلوسي حقيقي كان ضايع في محلات اللبس والبرندات المختلفه وده كان فسحتي الحقيقيه كانت بتبقي متعه بالنسبة لي كبيرة وانا بتفرج وبشتري كل شويه حاجات مختلفه وانسقها مع بعض وافكر ازاي ممكن اغير فيها وخاصه ان معظم القطع اللي في المحلات مقاساتها مش بتتناسب مع معظمنا وستايلها ماكنش مناسب للبنت المحجبه بس بعد فتره اتغيرت الموضه والاتجاه بقي للحاجات الفضفاضه او over size بمعني اصح والطويله وده بقي شيء تريند جدا وبتلبسه دلوقت البنت المحجبه وغير المحجبه وده بالمناسبه من احب وافضل الاستايلات واقربها لقلبي ومعظم تصاميمي بعتمد فيها علي كده جدا وبلاقي نجاح وتميز الحمد لله في كده.» وتكمل »‬انا حسيت ان عندي الموهبه وطبعا قررت انميها بالدراسه فأخدت كورس اتعملت منه تفاصيل اكتر في الخياطه وازاي اعمل باترون بنفسي لاي قطعه انا عايزاها ومع الممارسه وده المهم اتعملت اكتر ولسه ومازلت كل يوم بتعلم جديد،ومافيش صعوبات معينه قابلتني.
وحول بداية خوضها لمجال تصميم الأزياء تقول بسمه عادل عفيفي» بدأت في الاول أصمم بعض القطع واعرضها علي جروب خاص بيا علي الواتساب دخلت فيه صحابي وقرايبي وهما دخلوا كل معارفهم وبدأت اعمل قطعه ليا الاول واعرضها وكان في شهر رمضان بردو،بدأت بعبايه صممتها ونفذتها واتصورت بيها ولاقيت اعجاب بيها كبير من كل اللي حواليا وده شجعني جدا فعلا اني اعمل التانيه وافكر وابدع في التالته وهكذا وبدأ يجيلي اوردرات من المعارف والاصحاب الاول وبدأت انفذ قطعه لكل واحده بالطلب في البدايه، ولاقيت تشجيع كبير من كل اللي حواليا وده بيفرق بجد جدا في ان اي حد يتقدم ولو خطوه قدام تشجيع ودعم اللي حواليكي ده نقطه كبيره في اي حاجه تدخلي فيها بعدها بقي عملت بيدج علي الفيس بوك وبدأت تكبر ويجيلي ناس بطلبات ونفس الكلام انستجرام وبدأت اكبر الانتاج بدل ما اشتغل لكل عميله اوردر بدأت اعمل الموديل وانفذه بكميات ومقاسات مختلفه واعرضها متاحه للجميع».
وعن الصعوبات التي واجهتها قالت »‬هي مش صعوبات قابلتي اد ماهي استفزاز في اني اسوق لتصميماتي الكترونيا وهي للاسف سرقه الصور بتاعتي مش بتكلم حتي انهم يقلدوا التصميم وده وارد انا بتكلم علي صوري انا لان معظم حاجاتي انا اللي بكون عارضاها مثلا بتفاجأ بعملاء من عندي داخلين ويبعتولي صوري ويقولولي صورك علي الصفحه دي ومعروضه عندهم وبسعر تقريبا اقل من سعر الخامه لوحدها،وده انا بشوفه عدم امانه وقله ضمير لان اللي عايز يقلد حد يجتهد علي الاقل وينفذ القطعه بنفسه ويتصور كمان بيها بنفسه مش ياخد الصوره ويكتب انها متاحه وبالتأكيد هتوصل للعميل قطعه غير الصوره اللي معروضه بجوده وخامه مختلفه عن الصور تماما لان انا انتاجي وخاماتي خاصه بيا فقط فده عدم امانه منهم لعملائهم هما في الاساس.»
تقول بسمه عادل عفيفي انها اصبحت الان تمتلك خط انتاج صغير باسمها في ورشة تصنيع خاصةبها وتصنع فيها كل تصميماتها بمعدات وميكنات متطورة وحديثة ومعها بعض من الأفراد يساعدونها لإتمام المهام وخروج القطع بالشكل النهائي،وتكمل »‬ وكلنا بنكمل بعض ماحدش فينا يقدر يعمل حاجه لوحده كل حد فينا ليه دور في حاجه معينه بنعملها وفي الاخر بيطلع انتاجنا الحمد لله علي احسن شكل،وانا لسه ماحققتش يعتبر حاجه انا بعتبر نفسي من وجهة نظري لسه مابدأتش برغم ان الناس معظمها شايفني ناجحة بس النجاح بالنسبة لي مش في الخطوات دي لسه احلامي كبير وكتيرة وبإذن الله وحده تتحقق ان ربنا أراد ده وباحلم يبقي ليا براند باسمي في مصر وبره مصر و جوه الحلم ده تفاصيل كتير اوي ودقيقه جدا بإذن الله تتحقق».
وتقول بسمه عادل عفيفي »‬كولكشن رمضان السنه دي عندي مختلف قسمته بين حاجتين الاول الاساسي العبايات السوده اللي لاغني عنها بشياكتها وفخامتها وتميزها واخترت معظم العبايات اسود السنه دي ويكون الاختلاف بينها ان كل واحده هيدخلها لون او تصميم مع الاسود مختلف يميزها عن التانيه وحبيت ابعد خالص عن العبايات الالوان لانها متداوله كتير ومن كذا سنه ونفذتها قبل كده،الجزء التاني من الكولكشن الفساتين والكارديجان الطويل اللي يتلبس بكذا طريقه والالوان المبهجه هي الاساسي في القطع دي اللي بتكون اكتر مناسبه للسحور وعزومات رمضان،والمرأه المحجبه وغير المحجبه تقدر تلبس من كل التصاميم دي لان مافيش قطعه منهم هتعوق حد فيهم في طريقه لبسه كل حد هيوظف القطعه علي طريقة لبسه الخاصه واللي تناسبه،اما ألوان الصيف فمعروفه بتكون الالوان المبهجه كلها بس دايما كل سنه بيكون في كام لون غالبين علي باقي الالوان واشهرهم في 2019 لون المرجان واختارته في قطعتين من كولكشن رمضان بس بنقشات مختلفه مع بعض،كمان الفساتين والحاجات الفضفاضه من اكتر القطع وابرزها واشهرها في الصيف ومتصممه بطرق كتير مختلفه سواء بخامات بدون نقشه ساده او بنقشات مختلفه ومعاصره لموضه 2019.»
• دينا درويش