كلام فى الممنوع

من جنب التايا فى الغيط
والولعه القايده
والساقيه الدايره والتور
وياها بدور أفكارى
كل مانار الولعه تقيد
كل ما اشوف الواقع أكتر
كل ماجرحى معاه يزيد
واصرخ .. أصرخ وبصوتى المسموع
أعلى من صوت الساقيه
واعلى من صوت التور المخنوق
جوايا انسان موجوع
صلبوه ... والتهمة كلامه الممنوع
***
وافكارى تحدت بعضيها
أوعى تكون كدبت ياواد ؟
أكدب واكدب على مين
دى جريمتى إنى ما بكدبش
ولا عمرى غشيت انسان
وصراحتى على كل لسان
وبوزع ضحكاتى صدقات
والريع الجاى من السجرات
يبقى أكيد خربت الساقي
وقفت تروسها .. ؟
ماانا عارفك طول عمرك حشرى
ولاتسكت ع الحال المايل
الساقيه لسه ما وقفتش
ولايمكن توقف بدراع
الصوت النابع من القلب
أقوى من صوت الطلقات
وانا زى التور المربوط ولابتعب
ولاأقول دوخان
وساعات بنسى وبدل دورى
وأحس ان التور انسان
***
أمال بس ليه حبسوك
فى تروس الساقيه وصلبوك ؟
علشان مره .. وانا بلف تروس الساقيه
نسيت .. وشيلت الخلقه عن عينى
شوفت الميه اللى بطلعها
رايحه تروى فى تراب غيرى
قولت كفايه ... قولت حرام
ضاعت والله معاكو سنينى
صلبونى وقالوا وهمان
شيوعى حاقد وجبان
ناس بس عليها الدوران
وناس تشرب من غير دوخان