الصندوق الفاضى

فى واحد أمريكانى اسمه «مارك چونچور» بيشتغل ممثل كوميدى ومستشار زواج وأحد المتحدثين الأكثر طلبًا من الجمهور بسبب طريقته الذكية خفيفة الدم فى ربط الحاجات ببعض فى إطار كوميدى منطقى.
قدّم «مارك» واحدًا من أكتر الڤيديوهات مشاهدة حول الاختلافات بين دماغ الراجل ودماغ الست اسمه The Nothing Box ومعناه الصندوق الفاضى.
بيشرح «مارك» نظريته: دماغ الرجالة عبارة عن صناديق كتير جمب بعض وكل صندوق لحاجة محددة.
الصناديق دى قائمة بذاتها وغير متصلة ببعض، صندوق للعربية وصندوق للفلوس وصندوق للشغل وصندوق للعيلة وصندوق للرياضة، القاعدة الذهبية أن كل الصناديق لا تتلامس أبدًا ومبتنفدش على بعض.
فمثلاً لما يحصل أى نقاش مع شخص على موضوع معين، بيروح الراجل للصندوق الخاص به ويسحبه لبرة وبعدين يفتحه ويناقش محتوى الصندوق ده بس، ولما تخلص المناقشة يرجّع الصندوق لمكانه مع ضمان عدم ملامسته للصناديق التانية.
فى حين الستات دماغهم متصممة على شكل كورة كبيرة من الأسلاك ماسكة فى بعض. فمثلاً تلاقى موضوع الفلوس مربوط بموضوع الشغل والشغل مربوط بالوقت والوقت مربوط بساعات العمل وساعات العمل مربوطة بالويك إند والويك إند مربوط بالتخطيط هنعمل إيه فيه وده مربوط بالعيال والعيال مربوطين بالمدارس، وخد عندك يا جدع من ده حاجات كلها متربطة ومنفدة على بعض متعرفلهاش أول من آخر.
وبيكون مع التربيطة دى مَشاعر بتحسّ بيها الست (حب،توتر، خوف.. إلخ) داخلة فى المعادلة فتلاقى الستات عندهم ذاكرة حديدية وبيفتكروا الهوا الطاير عكس الرجالة لأن مواضيعهم فيها بمشاعر لحظية عاشوها.
لو رجعنا لدماغ الرجالة، «مارك» أضاف أن فيه صندوق فريد مفضل وموجود عند الرجالة فقط والستات بيكرهوه، الصندوق ده اسمه الصندوق الفاضى وده ممكن يفضلوا فيه لمدة طويلة ومبيخرجوش منه غير بخناقة.
أمثلة يومية لقعدة الراجل فى الصندوق الفاضى: لما يقعد قدام التليفزيون وفى إيده الريموت كنترول بدون أى نشاط دماغى ويقلّب فى القنوات إلى ما لا نهاية لحد مايجيب لمراته انهيار عصبى، أو لما يروح يصطاد ويقعد على البحر لساعات متواصلة ويعمل نفس الحركات الروتينية النمطية أكنه رجل آلى متبرمج ويعد سبع تمن ساعات متنّح على وضعه من غير ما يصطاد سمكة واحدة والدنيا حوليه تتهد وهو ولا هو هنا.
خلاصة القول إن الرجالة عندهم القدرة على التفكير فى اللا شىء، بس الستات مش كده والأسلاك فى دماغهم دايمًا فى الفيشة ومبيفصلوش إلا لو ناموا، أمّا الراجل ممكن ينام وهو مفنجل وقاعد فى الصندوق الفاضى.
النظرية السابقة ممكن تكون تفسير منطقى ليه الرجالة بيعيشوا أطول ويستمتعوا بالحياة أكتر فى حين الستات بتكبر أسرع وتبقى هتقطع شرايينها والراجل مش فاهم مالها.
اللهم صندوق فاضى للولايا …إحنا نص المجتمع برضه ولينا أهل يسألوا علينا.