أساليب جديدة لتحديد النسل

واضح جدا أن حملة «انظر حولك» وحبوب منع الحمل لم تجد صداها فى بلدنا، فقرروا محاربة الانفجار السكانى بأساليب أخرى، أكثر ذكاء، وأقل تكلفة.. إزاى؟!
البلاعات.. تتساب من غير غطيان.. مليون حادثة لناس تقع فى البلاعات، ويطلعوا هم الغلطانين لأنهم بيمشوا رافعين راسهم فالناس اتعلمت تمشى مطاطية راسها لتحت.. عشان يشوفوا البلاعات المفتوحة.. ويتفادوا الوقوع فيها.. خلصنا؟ لأ عمدان الكهرباء مفيش غطا على الأسلاك وسايبنها عريانة.. وطبعا الناس ماشية يا عين أبوهم باصين فى الأرض عشان خايفين يقعوا فى البلاعات المفتوحة، يقوموا يا ضنايا يخبطوا فى العواميد فيتكهربوا، الظريف بقى إنه مؤخرا توفى ولد صغير بس موقعش فى بلاعة.. ولا لبس فى عامود.. اتكهرب وهو ماشى فى الشارع.. وبعيد عن العامود!! كهربوا الشوارع يا عم!!
كهربوا الشوارع.. لقوا الناس بقت واخدة بالها وحاطين عينهم فى وسط راسهم.. وعينهم بتلف زى عقرب الساعة عشان تشوف زى الحصان 380 درجة ومبقاش حد يقع فى بلاعة ولا يخبط فى عامود.. قال لك نكهرب لهم الشوارع بقى.. هيصعقونا زى الناموس!! المهم أنا بقى بقترح نشترى الجزم أم رقبة طويلة دى، البلاستيك بتاعة غطاسين المجارى، عشان نمشى بها، أو القبقاب الخشب بتاع جدود جدودنا.. الله يرحمهم ويبشبش الطوبة التى تحت راسهم.. الظاهر إنهم كانوا بيعانوا من نفس المشكلة والتاريخ بيعيد نفسه!!