حلاوتك.. فى صراصيرك

النهاردة بس عرفت إحنا ليه مش حلوين زى بتوع أوروبا وأمريكا والدول المتقدمة، فقد قرأت موضوعاً عن النجمة العالمية «سلمى حايك» بتقول إن سر جمالها هو أكلها للصراصير بكل أنواعها، وبكل الطرق، مشوى، مقلى، صينية بالبطاطس فى الفرن.
قرأت الخبر، وجلست متنحة طول النهار.. بقى الصرصار اللى لما بنشوفه بنرقع بالصوت، خصوصاً لما يقف ويلعبلك شواربه، هو السر فى جمال الولية إللى زى القشطة دى، واكتشفت أخيراً، ليه البلاد دى ما فيهاش ولا صرصار، أنا كنت فاكراها نظافة، طلعوا أنهم بياكلوها، ونويت أشتغل فى توريد الصراصير، بدل ما إحنا قاعدين مكسحين ولا اللى قاعدين قدام السيدة زينب، وأبقى من سيدات الأعمال، وآخر أملة، وياريت بالمرة بقى نقاطع اللحمة والفراخ إللى بتجيب الضغط والكوليسترول والفقر والعياذ بالله، ونخلينا فى الصراصير إللى كلها فوايد، وتعالوا نطالب بمحمية طبيعية للصراصير ونسميها «جمعية حقوق الصراصير».