الخطوبة على العروسة والأجهزة على العريس!

أنا بابا يلا

هذه الحكايات، حكايات من وحى خيال الكاتب والرسام، وليست لها أى علاقة بالواقع الجميل، حكاية أب شايف المصلحة وعارفها وفاهمها.. ما هو كان جاى لما الباقى كان لسه هيروح! أومال إيه؟!
غصب عنه، مش بخاطره، رافض يسيبهم يجربوا بحريتهم، خايف عليهم حتى من نفسهم، أما أولاده.. لأنهم لسه رايحين فمش فاهمين، عايزين يجربوا، عايزين يفكروا بنفسهم لنفسهم.. وهنا تبدأ الحكاية.

منة: بابا.. ماما
الأب: أكتر كلمة بتقلقنى.. نعم
الأم: خير يا حبيبتى
منة: عندى خبر ليكم بس مكسوفة أقوله
الأب: خلاص ما تقوليهوش يا حبيبتى!
الأم: الله.. هو إيه ده.. قولى فيه إيه؟
منة: أنا جايلى عريس!
الأم: يا نهار أبيض.. يا فرحة عمرى.. أزغرط
الأب: فيه إيه يا ست.. هى أى هيصة وخلاص.. استنى
مش نعرف مين.. بيشتغل إيه.. ولا طالب زى المرة اللى فاتت
منة: لا شغال مبيعات فى شركة عقارات.. وخريج هندسة



الأم: اللهم صلى على النبى
الأب: إزاى خريج هندسة وشغال مبيعات
الأم: وماله.. مش المهم إنه بيكسب
الأب: يا ست انت بقى.. بطلى تدخلى الأفكار المقلوبة دى فى دماغ الولاد أبوس قعر رجلك
منة: هو لقى إن البيع فى العقارات بيدخل له فلوس أكتر فقرر يكمل فيه
الأب: يعنى معاه شبكة ومعاه يجهز وعنده شقة
الأم: أكيد أومال إيه
الأب: هو أنت أمه؟! إيش عرفك؟!
منة: آه معاه يا بابا.. ها ييجى بكرة؟
الأم: طبعا يتفضل
الأب: استنى يا ست.. عايز أعرف عرفتيه منين؟
منة: ما أنا صاحبتى بتشتغل مع الدراسة فى الشركة بتاعته واتقابلنا أكتر من مرة سوا
الأب: ومابتعمليش ليه زى صاحبتك.. وتساعدى أهلك
الأم: ده وقته بذمتك
الأب: وصاحبتك ماتجوزتوش هى ليه



منة: هو حبنى أنا يا بابا.. هااا أقوله بكرة
الأب: استنى.. أم منة.. دلوقتى الخطوبة على العريس صح؟!
منة: لا علينا إحنا
الأم: دلوقتى كله النص بالنص
الأب: مش لازم خطوبة أصلا على فكرة
منة: ليه هو أنا لقيطة.. أنا عايزة خطوبة وأفرح
الأب: ما تفرحى فى الفرح إيه الزيطة دى
الأم: ممكن نشوف الولد وبعدين نتكلم
الأب: لا أنا أعرف كل حاجة من دلوقتى
الأم: الخطوبة علينا والفرح عليه
الأب: طيب خليه ييجى الشهر الجاى
الأم: ليه يا راجل
الأب: عشان عارف اللى فيها.. هات جاتوه ويا عصاير ويا مصاريف تقطم الضهر
منة: هى دى مصاريف أومال لما أبدأ فى الجهاز
الأب: ماتفكرنيش
الأم: يا راجل مش كده.. ماتكسرش خاطر البت
الأب: اكسروا انتو ظهرى عادى.. طيب سؤال.. الأجهزة الكهربائية على العريس صح؟
منة: ما إحنا قلنا كله بالنص
الأم: حسب الاتفاق
الأب: لا والله أبدًا.. الكهربائيات على العريس معروفة!!
الأم: عندك ولد على فكرة
الأب: وقتها يحلها حلال
منة: ييجى بكرة
الأب: ييجى.. بس تفهميه إن الكهربا عليه