اللايف كوتش.. سبوبة؟!

الواحد بصراحة لازم يهتم بنفسه شوية.. والله باجى عليها جامد واللى حواليا مبسوطين.. يااه.. ليه يا بنتى كده أنتى عايشة كدة إزاى؟
عايشة فى الدوامة بعيد عنك.. نفسى جدا أقعد مع نفسى بس متكتفة بالمسئولية والالتزامات.. تفكير فى نفسى غير متااااح مطلقًا.
طيب أنا سمعت أن اللايف كوتشينج يساعد فى فهم النفس والسيطرة على القلق. لايف كوتشينج إيه.. هو إنتى شايفانى مجنونة؟!
قريتى عنه أو جربتيه؟!
يا ختى كله نصب فى نصب.. أنا هاعتبرك إنتى اللايف كوتش مش سمعتينى زى ما بيعملوا؟ انتى أولى.
بس هما ليهم طريقة معينة فى المناقشة والحوار عشان تساعدك تفهمى نفسك ومشاكلك وتعيشى بشكل أفضل.
قصدك إنى مش فاهمة نفسى؟
دى سبوبة.
بس تعرفى أن أنا جربته قبل كدة؟
بجد؟ إمتى؟ بس أنا شايفاكى كويسة.
إصبرى بس واحدة واحدة.. اللايف كوتش أولا مش بيشتغل مع مرضى خالص هو بيشتغل مع الناس العاديين اللى زيى وزيك بس بيكونوا عايزين يتخلصوا من أعباء ضاغطة عليهم نفسيا وموتراهم، أو ذكريات مضايقاهم، أو عايزين يطوروا من نفسهم ومش عارفين!
طيب وأنتى رحتى للايف كوتش ليه؟
عشان كنت زى ما بتقولى كدة بالضبط مش مقدرة نفسى كويس وبالتالى مش فاهماها. طب وعمل لك إيه بقى اللايف كوتش ده؟
أولا خلانى أعرف إن عدم اهتمامى بنفسى هو لأنى فى الأصل شايفة أنى (مش مهمة أوى يعنى) وأن أى حاجة حواليا أهم منى.
وطول ما أنا مش مهمة فى اللاوعى بتاعى باتصرف على الأساس ده وباضطر أحمل نفسى فوق طاقتها.
اللايف كوتش قال لك كده؟
لا.. أما قعدت أحكى وأطلع اللى جوايا مع اللايف كوتش، وبتعليقاته وأسئلته المحنكة على كلامى خلانى أكتشف نفسى وبنفسى.
طيب واداكى دوا بقى ولا عملتى إيه؟
ببساطة خلانى أكتب الحاجات اللى باحبها وأعمل كل يوم حاجة منها لمدة 10 دقايق وأحس بالفرق جوايا وفى يومى وأكتبه.
وكده بقى اتعالجتى؟
يا بنتى أنا مش مريضة واللايف كوتش مش دكتور.. هو بيساعدك تحطى إيدك على سبب الأزمة.
يعنى مش نامى على الشيزلونج وافتكرى طفولتك؟
لا ولا أدوية ولا فضفضة ده علم حديث يساعدك تعيش أفضل من خلال فهم نفسك. ممكن رقم اللايف كوتش؟!