ميدان التحرير

ريحة الميدان عنبر
ريحة الميدان
من مِسك
.. هو صحيح الميدان ده
عرفته في شبابي
ولسه فيه النهارده بتولد تاني
وشفت فيه المراية
وبست عقد الفل
وبعت ياما رسايل
مليانة حب في حب
وياما رحت المجمع
جددت «بسبوري»
سافرت ياما ف خيالي
ورجعت لجذوري
هو صحيح الميدان ده
.. شايفاه في ليلة قدر
هو نفسه الميدان
إللي اكتمل نوره
وتم فيه البدر
يا ميدان عرفته في شبابي
ولسه فيه النهارده
بتولد تاني
عودت عيني أراك
يا عمر مكرم
ثائر من الثوار
والثورة فرع أخضر
والفرع أصله يمد
حتي لسابع جد
••
عودت عيني أراك
يا ورد
يا اللي انسقي بالجراح عودك
في الشوك ياما اتصلب
في الميدان عودك
أستحلفك بالله ياللي قطفت الورد
حرام عليك الصبي
حرام عليك البنت
دي إيده ولا
دي إيدي؟
ده قلبها ولا
دا قلبي منسقي بالدم؟
أستحلفك بالله يا للي دهست الورد
تقوللي إيه ذنبي
إيه بس ذنب الورد؟!
ده في سلته شقشق
ده في كُمه ريحة مسك
يا مصر
يا طائر فريد
مكتوب علي جناحه
الأمان والخلد
يا مصر
يا عقد الياسمين والفل
ضمي الشهيد اللي جايلك
ووجهه زي البدر
وف إيده عود ريحان
صبّارة خضرة مخضرة
بتصبرك
وبتنسقي بالوجد
ضمي اللي جايلك
ومن أجلك
فارد سما تمشي علي رجليها
تجيلك عشان نظرة
فارد مدي عطشان
تحت رجلين نيلك
عشان قمرة
تغنيلك
عاشق
وكلنا عشاق
مشتاق
وكلنا بنجدد الأشواق
نبني في العلا مجدك نرفع للسما رايتك
وإذا متنا نموت شهداء.