كل حاجة ف حياتنا ب تعتمد فى النهاية على الحظ كل ب معنى كل حاجة خلينا الأول نقول إيه مفهومنا ل الحظ كل حاجة ب تقابلنا فيه احتمال إنه يحصل كذا واحتمال ما يحصلش مهما كانت نسبة احتمال من الاتنين كبيرة ف النهاية مادام فيه إمكانية ل الاحتمال الأصغر يبقى حدوثه «طبيعى» ب التالى، فعليا حدوث أى حاجة أو عدم حدوثها خمسين/خمسين مثال واحد ب يعدى الشارع احتمال عربية تخبطه واحتمال ما تخبطوش لو قلنا إنه ب يعدى شارع فاضى مش ب تعدى فيه عربيات كتير أو حارة صغيرة أصلا العربيات ما تحبش تدخلها ب التالى احتمال إن العربية تخبطه قليل بس «ممكن» يحصل ما دام ممكن يبقى حدوثه طبيعى طيب، ب أرمى زهر ومطلوب منى أجيب مثلا 4 علشان أكسب أى رقم تانى أخسر إيه احتمال إن الأربعة تيجى؟ الحقيقة إنها خمسين/خمسين مش واحد ل ستة أومال ليه ب يقولوا إنها 1-6 علشان هى فعلا 1-6 بس دا لما تكرر رمى الزهر ب معنى إنك لما ه ترمى الزهر ست مرات ييجى مرة على أربعة ب الدقة؟ لا طبعا بس قريب منها وكل ما ترمى أكتر نقرب من الدقة أكتر لو رميته 12 مرة ه ييجى مرتين تلاتة مش ه ييجى 8 مرات لو رميت الزهر 600 مرة ه ييجى على 4 100 مرة أو قريب منها مش ه ييجى 300 مرة ولا ه ييجى 5 مرات وخلاص (جربها، أنا جربتها كذا مرة) إذن فايدة الإحصاء ب تبقى فى تكرار الحاجة مش فى المرة الواحدة ثم إنه حتى لو مش حظ والحكاية متوقفة على مجهودك ما هو المجهود حظ حظك إن مجهودك وافر وصحتك كويسة أو حظك السيئ إنك ضعيف وب تزهق ب سرعة ومش ب تتحمل الجهد لو على ذكاءك محدش يقدر يخلى نفسه ذكى أو غبى ولا حد يقدر يخلى حد ذكى أو غبى الخلاصة إن كل حاجة ف الحياة ب تعتمد على عوامل كتييييييير جدا معقدة جدا أغلب العوامل دى بره إيدينا ما اختارناهاش وما نقدرش نختارها يبقى الدنيا حظوظ زى ما ب يقولوا دا صحيح لكن الاستسلام ل الفكرة دى خطر ليه؟ ل إنها فعلا ب تخلى حظك سيئ إزاى؟ أقول لك إزاى طول الوقت إنت معرض ل حدوث الاحتمال السيئ دلوقتى إحنا ب نقول الدنيا حظوظ ماشى بس سؤال تانى؟ هل فيه حد ب يوجه هذا الحظ؟ ولا الحاجات ب تحصل عشوائى؟ رأيى إنها عشوائى يعنى الكورة اللى جت فى العارضة مفيش حد زحزح العارضة شوية خلاها تصد الكورة ولا فيه زق الكورة سنتى خلاها تخبط ف العارضة هى الكورة لازم لازم ه تروح فى مكان المكان دا وارد يكون العارضة ووارد يكون الشبكة ووارد يكون بره المرمى خالص حظك بقى إنها خبطت فى العارضة لكن مفيش حد ولا حاجة خلاها تعمل كدا مفيش حاجة اسمها «حظى وحش» ل إن الكلمة دى كما أفهمها تعنى إن كل مرة، أو أغلب المرات اللى كان ممكن يحصل لى فيها احتمال جيد أو احتمال سيئ ب يحصل الاحتمال السيئ علشان النحس أو النصيب أو ..... إلخ إلخ دا كلام متخلف فى رأيى إنما اللى حاصل هو إن كل واحد مننا فى معركة مع الحياة معركة دائمة ومستمرة هى عشوائية بس قوية ومفترية وانت ضعيف بس عندك فرصة ما تبقاش عشوائى لما ب تستخدم عقلك وتقاوم حدوث الاحتمالات السيئة ب تقل حتما ب تقل لما ب تستلم ب تلطش لك ب تلطش لك أوى خلينا فى مثال الكورة لو أنا (مؤمن المحمدى) شوطت كورة من تلاتين ياردة أكيد أكيد مش ه تخبط فى العارضة ليه؟ علشان مش ه توصل أصلا ل المرمى دا مش حظ لما يبقى الاحتمال صفر مفيش حظ إنه يحصل أنا عضلتى قدرتها كدا والكورة وزنها كدا ف العضلة بتاعتى ما عندهاش القدرة إنها توصل الكورة ل المرمى فيزيا مفيهاش حظ لو لاعب محترف شاط الكورة ف فيه حاجات تساعده على إن تسديدته تبقى أدق استعداده، تدريبه، خبرته، قدرته على تحمل الضغط صفاؤه الذهنى بس برضه ممكن يعمل كل دا والكورة تيجى فى العارضة أو تطلع اوت صحيح بس إحنا قلنا إن تأثير الحظ ب يقل مع التكرار ب معنى إن اللاعب دا مش ه يشوط شوطة واحدة فى عمره كله ه يشوط ميت مرة لما يعمل الحاجات المطلوبة منه نسبته ه تزيد نقول توصل 80% معناها ه يجيب 80 جون لما مش ه يعملها نسبته ه تقل نقول توصل 40% معناها ه يجيب 40 جون بس وب التالى مقاومة الحظ ب تحسنه والاستسلام ليه ب يخليه أسوأ لاعب الطاولة اللى لازم يجيب 6 و6 (دوش) ويجيبه فعلا دا حظ لكن فى المرة دى بس لو كل دور لازم يجيب دوش علشان يكسب من كل مش عارف كام ميت دور ه يكسب دور علشان كدا الحرفنة فى الطاولة هى رص الحجارة (القواشيط) ب طريقة تخلى أى رقم ب النسبة لك احتمال جيد وأى رقم ب النسبة ل المنافس احتمال سيئ هنا بقى مش حظ ممكن يبقى ذكاء وأنا غبى حظى إن أنا غبى صحيح بس لما تكون غبى المفروض ما تلعبش لعبة ب تعتمد ع الحساب وإلا تبقى غبى ف الحكاية يا أصدقائى إن حياتك مش ف إيدك صحيح لكنها مش ف إيد حد تانى الأمر متوقف على مقاومتك ه تقاوم حظك ه يتحسن أوى مش ه تقاوم حظك ه يبقى شرارة عارف فين المشكلة؟ المشكلة إنه حتى القدرة على المقاومة مش ب إيدك فيه ناس مولودة ب القدرة على المقاومة وناس زيى كدا ب تستسلم من أول قلم حظوظ!
