إحنا ناقصات عقل ودين.. أنتم بقي ناقصين.. إيه؟!

ناقصات عقل ودين!! بغض النظر بقى عن التفسير الدينى الصحيح اللى كان يقصده الرسول عليه الصلاة والسلام.. خلاص الكلمة لزقت فينا وأصبح الرجالة بيستعملوها عمال على بطال.. ست تعترض على قرار لجوزها.. «يا بنتى انتم ناقصات عقل ودين»، أم تفضل تربى وتسهر وتكبر.. وأول ما شنبه يخط فوق شفايفه.. تحاول تنصحه أو تكلمه.. يرد بصوت أجش مبالغ فيه «انت فاكرانى عيل.. أنا راجل مش ناقص عقل ولا دين» من باب المعايرة يعنى.. طيب عندكم حق.. وإحنا نقر ونعترف إننا ناقصات عقل لأننا عاطفيات أكثر وناقصات دين بسبب تشكيلنا الفيسيولوجى.. تمام.. تعالوا بقى نعرف أنتم ناقصين إيه وكمان بدون مبررات لا علمية ولا حتى دينية.

الراجل اللطيف الشيك المتجوز ومخلف وفى أواخر الأربعينيات ويمكن أوائل الخمسينيات.. ويجرى ورا بنت أصغر من ولاده وينسى العشرة وينسى أولاده .. «ناقص إيه».

الراجل العصبى اللى ممكن يضرب مراته ناقصة العقل والدين وممكن يوصل للقتل!!.. يا ترى عنده ظروف زينا كده بتخليه عصبى فى أوقات معينة فى الشهر ؟!!! «ناقص إيه».

الراجل لما يبقى مهزوز فى قراراته حتى لو هو صاحب القرار.. عاطفى برضه «ناقص إيه».

الراجل لما يسيب أخته تنزل فى نص الليل تجيب حاجات أمه طالباها عشان مشغول على النت!! أو بيكلم صاحبته ولا خطيبته.. «ناقص إيه».

الراجل اللى ماشى يجيب سيرة دى وده ويلقح كلام على دى وعلى ده.. غاوى كلام نسوان يعنى «ناقص إيه».

الراجل اللى ممكن يوهم واحده إنه بيحبها ويلعب بمشاعرها ويبتز احتياجاتها .. «ناقص إيه».

الراجل لما يبقى عامل فيها سبع رجاله ومانع مراته من الشغل وسايبها تشحت من هنا ومن هناك وعامل نفسه من الهند.. وسجايره فى جيبه وبيرته فى التلاجة!! «ناقصه إيه».

الأب اللى سايب ولاده ومتغرب يا عين أمه عشان يؤمن مستقبلهم.. ويبخل عليهم بكل حاجة.. حتى بمشاعره.. ويعيش هو حياته بالطول والعرض ويخليهم هم اللى يدفعوا تمن غربته !! «ناقص إيه».

الشاب اللى يصمم يتجوز على حساب أبوه البسيط وهو له أخوات بنات.. ويضغط عليه فى الطلبات ويفهم خطيبته أنه واد عصامى وبيصرف على أهله!! «ناقص إيه».
الشاب العاطفى اللى كل يومين يقع فى حب واحدة ويتسلى لغايه ما يزهق وبعدين يقولها أنا معدم وهعطلك معايا!! عشان يفك.. «ناقص إيه».

الشاب اللى بيلبس سكينى محزق وتيشيرت عليه ستراس وبيعمل حواجبه وحمام بخار لبشرته!! لا مؤاخذة.. «ناقص إيه».

الزوج اللى بيشخط وينطر فى البيت لأمه وإخواته وهو ملبن مع مراته .. «ناقص إيه».

الزوج اللى بيسيب أمه تدخل فى حياته وحياة مراته وولاده.. «ناقصه إيه».
الراجل المستغل المصلحجى اللى ممكن يخلى ست ناقصة عقل ودين تصرف عليه .. «ناقص إيه».

الراجل اللى بيبص على أى بنت وكأنها عريانة وما بيغضش البصر ويرجع يقول شوف لابسه إيه.. فين أبوها.. أكيد مش ناقص دين زينا.. «ناقص إيه».

الراجل اللى ممكن يجرح مراته بكلمة زى بصى لنفسك فى المراية وهو توأم الشمبانزى فى فترة التزاوج.. «ناقص إيه».

الشاب اللى بيتحرش ببنت فى الشارع ويستغل ضعفها.. ناقص إيه.

الراجل اللى يشوف شباب بتتحرش ببنت فى الشارع ويتفرج ويقول هى اللى غلطانة إيه اللى منزلها!! «ناقص إيه».

الراجل الأنانى اللى بيفضل راحته عن راحة كل أهل بيته ويبقى وجوده زى عدمه.. «ناقص إيه».

الراجل اللى ما بيشتغلش ومراته بتشقى وتصرف على البيت.. «ناقص إيه».
الراجل اللى يتجوز على مراته من غير سبب غير الطفاسة أن ربنا موسعها عليه .. «ناقص إيه».

مش دى برضه نماذج الرجالة اللى موجودة فى مجتمعنا؟!! ناقصين.. حاجات كتيييييير وبدون مبرر.. أنتم ناقصين رجولة.. ناقصين تكونوا بنى آدمين.. صوت عالى بس من ضعفكم.. قوة فى أجسامكم بس فى الباطل.. طواويس من بره منفوخين ومن جوة فاضيين.. ريش على مفيش.

عارفين أنا لما بيتقال لى أنت بميت راجل.. بعتبرها إهانة.. لأن الميت راجل دول مافيهمش ولا راجل حقيقى.. الراجل مش صاحب القدرة المادية والجنسية بس الراجل.. ناقصين نخوة.. شهامة.. جدعنة.. مروءة.. دين.. عقل وناقصين رجولة.. بص لنفسك فى المراية قبل ما تتكلم وتقول ناقصات عقل ودين.. فكر دقيقة «أنا ناقص إيه» بص لنفسك فى المراية وراجع يومك وشوف هتقدر تبص فى عينك وتواجهها بنواقصك؟!! ولا هتحس أنك عايز تغير نوعك فى البطاقة بس يا ريت برضه ماتحطش أنثى لأنك عمرك ماهترتقى للمستوى ده..

إحنا فخورين إننا ناقصات عقل ودين لأن هذا كان لأسباب ومبررات إنسانية.. أما أنتم!!! فلكم الحق فى أن تخجلوا من أنفسكم.. يا ناقصين .. عقل ودين.. وأشياء أخرى.