ربيع ياسين من نجوم الكرة المصرية والأهلى والمنتخب السابقين يتمتع بأخلاقه العالية ورؤيته الفنية الصائبة والتى دفعتنا للتحاور معه حول الكثير من الأمور. ■ ما تقييمك لمسابقة الدورى هذا الموسم؟ - مفيش جديد والمنافسة لم تتغير والبطل معروف. ■ تقصد الأهلى؟ - طبعًا.. إحنا بنتكلم فى إيه.. الأهلى حسم الدورى من الأسبوع ال13، ومن السنة اللى فاتت لو عايزين نقول.. اللاعبون حققوا المطلوب ويلعبون بروح وجدية وواضح عليهم التصميم من أول الموسم. ■ حدثنا عن أبرز لاعبى الدورى؟ - شايف إن كل لعيبة الأهلى من أبرز اللعيبة فى الدورى. ■ تقيمك لصفقة «صلاح محسن» والتى تعد أغلى صفقة فى تاريخ الدورى؟ - صفقة كبيرة طبعًا وأكيد الأهلى عرف ينشن صح.. لاعب موهوب ولديه إمكانيات هائلة وهيفرق مع الأهلى. ■ رأيك فى عودة غالى للأهلى، وهل هو قرار صائب أم مجاملة لتاريخ الاعب؟ - قرار صائب طبعًا غالى نجم كبير والأهلى محتاجة الفترة الجاية مش مجاملة لغالى أبدًا. ■ وبالنسبة لمتعب؟ - خطوة كويسة من الأهلى متعب كان محتاج الاحتراف فى السعودية وفرصة لمتعب يثبت نفسه ويظهر قدراته اللى كلنا عارفنها وأتمنى أشوف متعب فى المنتخب من جديد. ■ أسباب تراجع الزمالك؟ - الزمالك محتاج لجنة كورة جديدة ولعيبة جديدة ومدرب جديد ودا اللى بيحاول يعمله علشان يرجع ينافس على الدورى من جديد. ■ تقيمك لأداء المنتخب تحت قيادة كوبر؟ - المنتخب وصل كأس العالم بعد غياب 28 سنة.. كوبر مدرب رائع والدليل أنه حصل على أحسن مدرب فى إفريقيا. ■ هل ترى أن محمد صلاح يقدر يشيل المنتخب؟ - صلاح نجم كبير طبعًا منقدرش نختلف على دا، لكن مفيش حاجة اسمها لاعب يشيل المنتخب لوحده المنتخب فيه لعيبة كتير كويسة يقدروا مع بعض يعملوا نتائج رائعة فى كأس العالم. ■ أيهما أفضل لصلاح.. الانتقال لمدريد أم الاستمرار فى ليفربول؟ - نصيحتى لصلاح الاحتراف فى ريال مدريد لأنه نجم كبير ويستحقها. ■ توقعاتك للمنتخب فى المونديال؟ - كل خير إن شاء الله.. واثق أن المنتخب يقدر يحقق نتايج رائعة وواثق فى قدرات الجهاز واللاعبين.. إحنا عملنا إنجازا إننا نوصل كأس العالم بعد غياب طويل, وإن شاء الله نحقق إنجازا فى روسيا نعمل حاجة كويسة تفرح المصرين.
