«الغندور» ل«سعد»: أنت «مضلل»

أعلن محمود سعد، مقدم برنامج «آخر النهار» المذاع على فضائية «النهار»، عن صلة قرابة بين «محمود الغندور»، الشاب الذى انضم مؤخرًا إلى تنظيم «داعش» الإرهابي، ولاعب الزمالك السابق «خالد الغندور»، والذى اتضح لاحقًا أن «محمود» قريب ل«جمال الغندور» الحكم الدولي، وعلى اثره اعتذر «سعد» عن هذا الخطأ الفادح وقام بتعديل معلوماته بعد عودته من الفاصل الإعلاني.
لم يكتف «خالد الغندور» بهذا، فقام بنشر رده على تلك الغلطة، عبر حسابه على موقع التواصل الاجتماعى «فيس بوك»، بشكل لا يليق بشخصية عامة مثله، فقد وصف سعد ب«الإعلامى المضلل»، فقال: «محمود سعد بيقول انضمام محمود الغندور ابن شقيق خالد الغندور لداعش، أنا معنديش أخوات ولاد أصلًا، قبل ما يتهموا الناس بالباطل يتأكدوا من المعلومات، وفين فريق الإعداد اللى المفروض يجيب الأخبار صح، للأسف هو دا الإعلام المضلل».. وكان «سعد» عقلانيًا فى الرد على اتهامات الغندور، الذى لم يترك له فرصة الرد، ولم يقم بمداخلة هاتفية ينفى ذلك بشكل محترم، فقد اعتذر «سعد» مرة أخرى عن معلوماته الخاطئة، وقام بتأنيب «الغندور» على تسرعه فى اتخاذ الأحكام وإبداء الرأى دون الإيقان بنية من يهاجمه، فقال: «خلاص أنا قولت حاجة غلط وصلحتها على طول، وزميلنا قالى دا الكابتن خالد طالع بيسيح على الفيس بوك، فسألته أنت قولتله إن أنا اعتذرت، قالى بعتله على صفحته اللقطة اللى بعتذر فيها عن كدا، لكن هو طلع وقال إعلام مضلل، هو يقول زى ماهو عايز على عينى وعلى راسي».. واستطرد «سعد» متهكمًا، فقال: «أنا مش متعود أرد على حد، بس عايز أقولك الإعلام المضلل مش اللى يقول خبر ويصلحه، لكن هو الذى يقول أفكارًا تضر بالمجتمع عشان كدا اسمه إعلام مضلل يعنى زى المشهد بتاع توفيق الدقن وعبد المنعم إبراهيم العلبة دى فيها فيل وهى مفيهاش حاجة، عشان تبقى عارفها بس ولما تقولها على حاجة بعد كدا تبقى عارفها».. وانتهى «سعد» بالاعتذار مرة أخرى ل«الغندور» لعله يدرك أنه لم يكن خطأ مقصودًا، كما أنه لا يحتاج إلى كل التضخيم الذى افتعله «الغندور»، فقال: «لو كنت زعلان حقك عليا وأنا متأسف، وأنا قولت عايز بقا تشتم اشتم زى مانت عايز، أنا لا اغضب وياما دقت عالراس طبول، أنا من أكتر الناس اللى لما تغلط تقول عالشاشة، ساعات يقولى عدت وخلاص محدش خد باله، أقولهم لا، فلا تغضب يا أخى أنت ابنى فى الآخر حتى لو قلت إننا إعلام مضلل فقد شرحت لك، ولك ما تشاء يا أخي».