إبداع

شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبروننا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بشهر رمضان الكريم من خلال عدد من قصائد مبدعينا الكبار
المسحراتى
اصحى يانايم وحد الدايم
وقول نويت
بكره ان حييت
الشهر صايم
والفجر قايم
اصحى يانايم، وحد الرزاق
رمضان كريم
مسحراتى يامؤمنين
منقراتى مد الأنين
الله على رعشة الحنين
عمره ماكان الأمل ضنين
ياقدس يانوارة السنين
كأن عينى فى ميتمى
ياقدس مايحتمل دمى
إلا أشوفك وأرتمى
وابوس ترابك المريمى
أبويا وابنى على فمى
ماأتوهش ياقدس فى المطال
ياعاصره مهجة الرجال
سقاك من دمعته الهلال
ياقدس ياسبحة الشقا
الأعمى فى سجدتك رأى
والفجر من صخرتك سقى
ياقدس تتفجر الجراح
والصبر حرب وأيوب صلاح
ياأخت من مكه والبطاح
قلبى انضرب للعرب وصاح
لابد من فتح فى الصباح
المشى طاب لى
والدق على طبلى
ناس كانوا قبلى
قالوا فى الأمثال
الرجل تدب مطرح ماتحب
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال
لما تقول أجمل مافى الدنيا
الميه للعطشان
يعرفوك عربى
أما للراوى ريحة البرتقان فى مداخل يافا
يعرفوك عربى
لما تقول ابنى اتولد لاجئ
يعرفوك عربى
لما تقول يارب
يعرفوك عربى
لما تباشر جهادك، ترمى أوتادك
فى قلب دابح ولاد
يعرفوك عربى
اصحى يانايم وحد الدايم
السعى للصوم خير من النوم
دى ليالى سمحه
دى نجومها سبحه
اصحى يانايم
يانايم اصحى
وحد الرزاق
رمضان كريم
اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
مسحراتى منقراتي
ليله فى حياتي
ومع السلامه
بسمع بودني
حس يعاودني
وبنتى وابني
مع السلامه
مشيت اعرّج
عشان افرج
النجم رجرج
مع السلامه
انا اللى حارت
برجلى حاره
مع السلامه
مطرح ما ادور
الاقى منور
عمال يشور
مع السلامه
خالصين ياقافيه
خليك بعافيه
مع السلامه
انا عينى بكّت
وقلبى نكت
ناولنى فكه
مع السلامه
انا جاى بكره
الاجر اجره
افطر بفطره
ومع السلامه
انا بكرى ارجع
اغنى واسجع
تلايمنى تسمع
مع السلامه
ومع السلامه
المشى طاب لى والدق على طبلي
ناس كانوا قبلى قالوا فى الامثال
الرجل تدب مطرح ماتحب
وانا صنعتى مسحراتى فى البلد جوال
شعر : فؤاد حداد
رمضان منور
االنور ملو الشوارع
ومليون راديو والع
الساعة اتنين صباحاً
لكين إيه الموانع
الخلق رايحة جايه
والدنيا لسه حيه
مليانة بالهأو أو
وزعيق القهوجية
واحد يقول لواحد:
خليك ياعم قاعد
التانى يقول: شكراً
ده أنا م المغرب مواعد
فيه سهرة لسه عندى
فى بيت فلان فندى
ح ناكل حاجه حلوه
ونشرب تمر هندى
واللى تروح دالقة جردل
فوق حضرة المبجل
طبعاً صاحبنا يزعل
وينفجر شتايم
والحى كله يوصل
مابين مصلح ولايم
اللى يقول: ياجماعة
واللى يقول: يا بهايم
ومطرب الإذاعة
يصرخ وفى وجده هايم
ولو طرطقت ودنك
فى وسط دى العظايم
تسمع مسحراتى
بطبلة صوتها واطى
بيقول: اصحى يانايم
شعر – صلاح جاهين
يا وحوى
من قبل رمضان بجمعه الهرس دار فى الدار
شالوا الموبيليا وحطوا العفش بالمندار
بالمكنسه دور وبالفرشه سبع تدوار
صبح البلاط زى خد المزمزيل ناعم
والشقه بصت لهيلتون نفسه باستحقار
جابو قمر دين وتين وزبيب وصنيبر
ومكسرات فى شكارات مقفولة بالميبر
فاضل فى شعبان تلات ايام ياشحيبر
راح تعملم ايه فى رمضان ابقوا تعالو لنا
والكل بات فى حسابات تلخم يهود خيبر
رمضان دخل.. كل عام وانتم بخير قالوا
مشاوير كتير مشوروا واتحطوا واتشالوا
علشان كنافة «ميدان الست» واحتالوا
حتى الولد لما راح – واتهربد القفطان
اضطر ينزل معاه البيه يجيبهاله
ومن حوارى «الحسين» راحو اشتروا الطرشى
خيار ولفت وبصل ولمون قديم محشى
فوق البوفيه رصوا برطماناته ولاساعشى
أحمر وبنى وبمبه وعنبرى واصفر
ويومين يا دوبك ده كله يروح ما يرجعشى
السمن نازل يرف.. وكانوا جايبين كوم
والبيت معبأ بريحه قلى طول اليوم
فيشاوى بالليل ومن بدء النهار النوم
ولا شغله ولا مشغلة غير بس «ياوحوى»
والكل فاطرين ياعينى ولم لهم فى الصوم
شعر – صلاح جاهين