من مسحراتي فؤاد حداد بعلو حسي

صحي يا نايم وحد الدايم
وقول نويت
بكره ان حييت
الشهر صايم
والفجر قايم
اصحي يا نايم
وحد الرزاق
رمضان كريم
مسحراتي
منقراتي
وانا بانادي
بعلو حسي
يا دنيا حسي
الحق بين
ومصر أولي
حققنا ثورة
وقمنا صخره
وعرقنا زين
ارض البطولة
إحنا اللي إيدنا
خلت حديدنا
حديد حنين
علي الطفولة
وصباح مندي
علي الولاد دي
طريقها هين
ما فيهش غوله
وانا السنه دي
شقت سنابلي
في كل وادي
والليل خطب لي
قمر زبادي
بسحر بابلي
وضي هادي
فردت حبلي
بطول بلادي
المشي طاب لي
والدق علي طبلي
ناس كانوا قبلي
قالوا في الأمثال:
الرجل تدب مطرح ما تحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي
حته من كبدي
حته من موال:
انا بلدي حره بنيت علي غصنها عشي
ولقمة الحب بتفطرني وتعشي
أنا عاوز ابني يعيش والظلم ما يعيشي
يا رب اللي خلقت لنا البصر واللمس
ولاترسم الشمس إلا النور علي وشي
اصحي يا نايم وحد الدايم
السعي للصوم خير من النوم
دي ليالي سمحه نجومها سبحه
اصحي يا نايم يانايم اصحي
وحد الرزاق