عشان الثورة تطلع حلوة

كتبت: حياة بدر..الحمد لله إنى مرحلة تانية فى الانتخابات، عشان كل يوم بتأكد أكتر إنى عمرى ما هنتخب أحزاب الحرية والعدالة والنور والجماعة الإسلامية، وبصراحة اللى بيتقال من ناس أعرفهم عن الانتهاكات اللى بيقوموا بيها ، والزيت والسكر اللى لسه بيتوزع، التهديد بالنار والوعد بالجنة، التشكيك فى دين وإيمان اللى بينتخب غيرهم يخلينى أشمئز وأحزن إن حد من دول يمثلنى، لكن برضه التعميم لا يجوز، أكيد فيهم ناس كويسة ومحترمة لا تقوم بتلك الدعايه المغرضه والمحرضة.. عن نفسى أنا هاروح الانتخابات لابسة أسود على إخواتى الشهداء والمصابين اللى من غيرهم لا كنا عرفنا انتخابات ولا كان هيبقى فيه أحزاب أصلا، ومعلقة بادج صور الشهداء كرسالة، وبقول إنى نازلة تحيه ليهم واعترافا بالجميل، وإنى هدى صوتى لشباب الثورة أو الأحزاب المحترمة صاحبة المبدأ بجد زى الوسط، والعدل، وحزب الثورة مستمرة، دى وجهة نظرى، ولا افرضها على أحد، بس حبيت إنى انشرها ونيتى فيها لله يمكن حد ينتفع بيها واخد ثواب معاه.
كلمة أخيرة.. بوصى اللى لسه منتخبش من فضلكم تمسكوا بإمضاء وختم القاضى أو المستشار اللى فى لجنتك، متسمحش لمرشح يدخل اللجنة، لو فيه تجاوز صوره وانشره من باب التوعيه لا التشهير، واقرأ الفاتحه للشهداء، وادعى للمصابين، وسواء اختلفت او اتفقت مع التحرير وغيره من ميادين مصرهيفضلوا رمز الثورة وأجمل ما فى مصر
والله أنا لا أجندة ولا بلطجية ولا?قابضة ولا?بعمل دعاية ولا?حتى توفيق عكاشة!!