تناتيش

* أنا زعلان قوى من الإعلامى والصحفى اللامع محمود سعد لسخريته من السيد عمر سليمان؛ لأن الرجل تصرف كأى مواطن عادى وذهب ليتجول، فى أحد المولات، زى كل خلق الله بدون حراسة ولا يحزنون..!
سعد قال إن واحد «قفش» سليمان وصوره، ويتساءل بسخرية: هو ليه ماخدش معاه «الراجل اللى واقف ورا عمر سليمان..!!
جرى إيه يا جماعة؟!.. أنتم مابيعجبكمش العجب ولا الصيام فى رجب.. إذا المسئولون مشيوا فى مواكب شيروكى ومرسيدس بعيون وعطّلوا المراكب السايرة ومصالح البلاد والعباد انتقدتموهم.. وإذا مشيوا زى كل خلق الله بدون حراسة ولا مواكب ولا دياولو.. اتريقتم عليهم..!
عايزين إيه بالضبط من الراجل المحترم عمر سليمان.. يفتح الشباك ولاّيقفله..؟!
* بالمناسبة.. احنا بصراحة بقى عايزين نعرف مين هو «الراجل اللى ورا محمود سعد» ومخليه طايح كده فى خلق الله بدون أى ضابط أو رابط.. أو أى إحم أو دستور..!!
* المسألة مش مسألة كرامة.. إذا كان هناك عدم توافق عربى على ترشيح د.مصطفى الفقى كأمين عام للجامعة العربية.. فعلى مصر أن تسارع إلى طرح اسم مرشح آخر حتى لا يضيع هذا المنصب الرفيع منها..!!
لماذا لا نرشح د. نبيل العربى وزير الخارجية، على أن يتولى الخارجية شخص آخر.. فخريجو مدرسة الدبلوماسية المصرية العريقة كثيرون.. وكلهم، بعون الله، يصلحون لتولى أعلى المناصب..
* قالت لى القارئة المواظبة على قراءة «آخر كلام» سميرة فؤاد سعيد: جرى إيه يا أستاذ..؟! إنت ماتكتبش ليه عن أم تيتى وأم لالو.. وأم ترتر..؟!
قلت لها يا أستاذة: عيب هو فيه رئيس تحرير برضه يكتب عن الأشكال دى..؟!
قالت لى: آه يكتب؛ لأن أم تيتى وأخواتها هما اللى هايفسروا لينا إيه اللى بيجرى من فوضى فى البلد اليومين دول..!!
* إلى كل القراء والزملاء الأعزاء الذين اعترضوا على صورة الممثلة منة شلبى فى صفحات الفن الأسبوع الماضى، واعتقدوا أن فستانها «مفتوح خالص» من الجنب: والله العظيم يا جماعة الصورة فى منتهى الحِشمة.. كل اللى حصل إن الزاوية اللى واخدها المصور بتظهر ساق الممثلة وكأنه، لامؤاخذة، حتة أعلى من الساق، وهو غير صحيح..!
يعنى احنا والحمد لله نيتنا سليمة، والممثلة كذلك.. المشكلة بقى فى نية القراء والزملاء.. هى اللى وحشة..!! انتوا ماعندكوش أخوات بنات..!!
* كلمة ورد غطاها:
* شفت الفنان الجميل عمار الشريعى قال إيه..؟! قال إن السلفيين لو وصلوا للحكم.. فسوف يعتزل التلحين.. والفن ويعلن توبته..!!
** طيب يا عم احمد ربنا إنه ماقالش إنه هايلبس النقاب كمان..!!