تناتيش

* لأول مرة أتأمل فى المعانى «العميكة» لكلمات أغنية حمادة هلال عن شهداء ثورة يناير.. خد عندك تأكيد هلال على أن ثوار 25 يناير ماتوا فى أحداث يناير؟! شفتوا الصدف؟! يعنى ثوار 25 يناير ماماتوش فى ديسمبر ولا فى نوفمبر.. ماتوا فى يناير.. وهى صدفة خير من ألف ميعاد.. وسر تكشفه لنا الأغنية لأول مرة..
المعنى العميك الثانى هو إنهم ماتوا وسابوا الحياة.. يعنى ماماتوش وعاشوا فى الحياة.. لأ.. ماتوا وسابوا الحياة.. وهى مفارقة غريبة جدًا لأن احنا زى ما كلنا عارفين إن الناس بتموت ومابيسيبوش الحياة.
واضح إن ده النوع الجديد اللى باتنين كامة اللى نازل اليومين دول..!
* مش عارف ليه الناس مخضوضة كده من أرقام المليارات اللى نهبها الفاسدون وهربوها خارج البلاد..
يا جماعة.. ما تتخضوش قوى كده.. المليار جنيه دا مبلغ مايجبش حاجة فى الزمن ده..
طب دا أنا امبارح دخلت سوبر ماركت بورقة بمليار جنيه وخرجت بربع براميلى وربع حلاوة طحينية وتمن بسطرمة وعشر بيضات، وادونى الباقى سبعتاشر قرش ونص..!!
حد هايقول إيه ياسيدى الذمة دى..! سبعتاشر قرش ونص..!!
أقول له: أيوه سبعتاشر قرش ونص.. لا قرش زايد ولاقرش ناقص.. إحنا هانكدب ليه.. دا حتى الكدب خيبة..!!
* أغرب مكالمة تهنئة بتولى منصب رئيس التحرير تلقيتها من واحد بيدور على عيل تايه من 25 سنة.. ويعمل موجهاً للتعليم بالمنصورة: آلو.. أخويا محسن..مبروك يا أخويا أنا أخوك محمود..
قلت باستغراب: محمود مين؟ أنا ماليش اخوات اسمهم محمود..!!
قال لى: ياسيدى أنت مش اسمك زى ما قال التليفزيون محسن أحمد حسنين وبقيت رئيس تحرير.. أنا بقى اسمى محمود أحمد حسنين موجه بالتربية والتعليم.. وأنت أخويا يا محسن اللى خرج من المنصورة من 25 سنة ولم يعد وتاه فى زحام القاهرة..!
ياسيدى أكيد فيه غلط... أنا تايه فى زحام القاهرة آه من أكثر من نص قرن بس أنا مش أخوك..!
قال لى: طيب إيه الاسم اللى بعد حسنين؟
قلت له: عاشور..
قال: آه يا خسارة.. ماطلعتش أنت.. أعذرنى ياسيدى.. أخويا اللى تايه من 25 سنة ملخبط لى دماغى وكيانى ومحول حياتنا كلها لجحيم.. أنا آسف على الإزعاج..!
* يعنى إيه الكابتن حسن شحاتة المدير الفنى لمنتخب الشلل الكروى يقول إنه لن يرحل إلا بعد أن يقيلوه من تدريب المنتخب..!
يا أبو كريم استهدى كده بالله وماتركبش دماغك.. أحسن لو ماخلعتش من نفسك هايعملوا لك مظاهرة مليونية يوم الجمعة الجاية فى التحرير.. ويخلعوك.. أنت مش هاتيجى أعز من اللى بيتخلعوا اليومين دول!!
* كلمة ورد غطاها:
* شفت البقرة الحلوب اللى اسمه جلعاد شارون ابن الإرهابى برخصة شارون بيطالب بإيه؟! قال بيطالب بإبادة العرب وإزالة الفلسطينيين من الوجود!
** ياسيدى اللى خلف ماماتش ومن شابه أباه فما ظلم.. وحط الزير على أخوه يطلع «العجل» لأبوه..!!