هجرة الخصال الحميدة / عصام سرور

هجرة الخصال الحميدة


* عصام سرور

انعى للمنطقة العربية هجرة الخصال الحميدة التى عاشت بيننا منذ بدء الخليقة تمتعنا واتصفنا بهذة الخصال الحميدة حتى غارت منا الامم وحسدتنا على اتصافنا بهذة الخصال الجميلة الخصال التى نادت بها شرائعنا السماوية الخصال التى نادى بها سيدنا عيسى علية السلام ونادى بها خير خلق اللة سيدنا محمد علية افضل الصلاة والسلام أين ذهبت - مسمعتش اخر الاخبار . خير فية اية .بيقولوا الخصال الحميدة هجت من كل الدول العربية وركبة طيارة وبيقولوا طفشانين مننا .
ياعم قول كلام غير دة . زى مابقولك كدة . دا حتى الطيارة ناقصلها ساعتين وتطلع . وبعدين اية العمل . العمل عمل ربنا .


خدت عربيتى وطلعت جرى على المطار لقيت الطيارة واقفة قلت ياد اطلع شوف اية الموضوع . طلعت لقيت كل الصفات الحميدة التى اتصف بها العرب طوال حياتهم داخل الطائرة لقيت الحب والتسامح والطيبة والرحمة والخير والنخوة والمرؤة والشجاعة والكرم والامل لقيت كل الصفات دى جوة الطائرة . اية ياجماعة على فين . انت مالك خليك فى حالك . ياجماعة البلادى احسن من غيرها .


لأ ياسيدى ملناش عيش معاكم . لية بس داحنا منقدرش نستغنى عنكم لأ ياسيدى تقدروا واستغنيتوا كمان .طيب فهمونى اية اللى حصل .


- رد الحب قال اناشخصيآ طهقت ومش قادر استحمل الكرة بيحربنى فى كل بلد من بلادكوا فى اليمن نزلين قتل فى بعض فى العراق سنة وشيعة فى لبنان الفلسطينيين الكرة راكبهم مصر مسلمين ومسيحيين عايزين يولعوها السودان شمال وجنوب وبقية الدول العربية بيكرهوا بعض الكرة اتغلب علية انا اصبح مليش مكان فى البلاد دى .


- ردت الرحمة والتسامح وقالت شوف يا أخ القسوة اصبحت الصفة الغالبة فى تعاملات شعوبكم بينها وبين بعضها شوف كمية الصراعات اللى انتو عايشين فيها ومحدش بيرحم ولا بيسامح ياخى دا القسوة بقت بين الاب وابنه والابن وامة والاخ واخوه بقى دى عيشة دى ياعم سيبنا خلينا نطفش جتكم الأرف .


- رد الخير والطيبة شوف ياأخ انت اسمك اية . مش وقتوا . شوف ياأخ مش وقتوا الشر بقى هوة السمة الغالبة عليكم بقيتوا اساتذة فية امال تفسر بأية كمية الجرائم اللى بتعملوها من سرقة وضرب وقتل يااخى داحنا شفنا جرائم قتل مسمعناش عنها فى عصور الجاهلية . وجة الدور على النخوة والمرؤة قالوا ياعم بلا نيلة عليكوا اخواتكم بيتقتلوا فى كل حتة اللى مافية واحد فيكوا نجدهم وقال دول اخواتى ولازم اقف جنبهم مش فالحين غير الصراخ والعويل وتوزيع الاتهامات على بعض اتفو


. طيب ياعم اللة يسامحكم


-ردت الشجاعة وقالت بص يابنى زمان كان الواحد منكم يفوت فى الحديد دلوقتى الجبن بقى سيدكم كفاية بس اى دولة اجنبية تبصلكم تترعشوا من الخوف واصبحتوا عبيد ليهم


. رد الكرم وقال ياعم ولا كرم ولا هرم البخل سيطر عليكوا دا حتى فرض ربنا وهوة الزكاة من بخلكم مبقتوش تتطلعوة دا ممكن اخوات ليكم يموتوا من الجوع ومحدش فيكم ينجدهم شوفوا اخواتكم فى غزة وفى العراق وفى كل الدول العربية فيها محتاجين وانتوا البخل ركبكم روح ياشيخ ربنا يفضحكم اكتر مانتوا مفضوحين .


- بينى وبينكم لقيت عندهم حق اصل احنا العرب عيشتنا بقت مايعلم بيها الا الولى عز وجل بس قلت ياد اعمل محاولة اخيرة معاهم يمكن يغيروا رأيهم . طيب ياجماعة علشان خاطر ربنا متسيبوناش . قالوا ماهو ربنا مش راضى عنكم ولا عن اللى انتوا فيه علشان كدة سايبنكم . طيب فى عرضكم فى طولكم . متحولش .


لاحول ولاقوة الا باللة . وفجأة اعلن المزيع الداخلى عن موعد قيام الطائرة . تعلن شركة خطوط جامعة الدول العربية عن قيام رحلتها رقم زيرو المتجة اللى اى مصيبة بعيد عنكم . قلت ياواد الحق نفسك وانزل من الطيارة ولسة نازل لقيت صوت جاى من ورايا . استنى انا جاى معاك .


ببص ورايا لقيت الأمل نازل جرى على سلم الطائرة جريت علية وخدتة بالحضن ودموعى نزلت وقلتله واللة يااخى فى وقتنا دة ميلزمناش غيرك وطول ماانت معانا ان شاء اللة نقدر نرجع كل الخصال الحميدة اللى هجرتنا . تفتكروا نقدر . قولوا يا رب .



*كاتب من مصر
البريد : essam.sror@gmail.com