"كل اختياراتي مفرحة حياتي" و"الوسط الفني بيعشقني".. أبرز تصريحات محمد أنور ببرنامج "تفاعلكم"

حل الفنان محمد أنور ضيفًا على برنامج "تفاعلكم" تقديم الإعلامية سارة دندراوي ويذاع على قناة "العربية"
وأجاب "أنور" على العديد من الأسئلة بفقرة "25 سؤالًا" والتي تطرق خلالها لبداية مشواره الفني، ونجاح "مسرح مصر"، وعلاقته بالوسط الفني ومن الأقرب له، إلى جانب انتمائه الكروي، كما تحدث عن من أهم ممثل وممثلة كوميدي في مصر، إلى جانب التفاصيل الخاصة بحياته الشخصية.
وفي السطور التالية نعرض لكم أبرز تصريحاتها خلال لقائها:
- حسيت إني مشهور من أول "مسرح مصر".
- أكتر كوميديان بيضحكني هو عادل إمام.
- أدي لنفسي 9/10 كممثل دراما ده ثقة بالنفس ده جانب الناس هاتشوفوا واحدة واحدة مني.
- كل اختياراتي مفرحة حياتي.
- أنا مش مشتري متابعين على السوشيال ميديا وعندي 6 مليون متابع على إنستجرام ومش بتفاعل ولو اتفاعلت العدد هيبقى أكبر من كده بكتير.
- مش شايف إن فيه مقارنة عمومًا بين معهد فنون مسرحية أو آداب مسرح هو كلنا بنكمل بعض يعني حتي خريجين مسرح الجامعة ماهم في الأول وفي الآخر اتعلموا المسرح برضه طالما ممثل كويس وقادر يثبت نفسه مش لازم يبقي متخرج من الأكاديمية.
-علاقتي سيئة باللغة الإنجليزية وبناتي بيتكلموا إنجليزي هم بيكلموا معايا عربي عارفين أني غلبان وهم عشان المدرسين بتوعهم بيتكلموا إنجليزي كتير فبقوا هم الإنجليزي بتاعهم كتير وأنا كلامي معاهم بقى قليل.
- شايف إني أقدر أقوم ببطولة مطلقة بس ده محتاج وقت بالنسبة لي شوية أن الواحد يكون عنده جماهيرية وشعبية في السينما لأن جمهور السينما مختلف تمامًا عن جمهور التليفزيون.
- عملت نيولوك عشان خاطر فيلم "مستر إكس" واللي طلب مني كده الاستايلست والمخرج قالولي عاوزين نغيرك تغيير شامل وكنت خايف من ده جدًا لأنه أول حاجة يعتبر بعلمها في السينما قولت لهم أنا شبه اللعيبة اللي بتيجي تلعب في الدوري المصري من شمال أفريقيا وبعد كده لقيت الناس تقبلت شكلي الجديد واتبسطوا بيه.
- أنا كنت أهلاوي متعصب بس هديت دلوقتي كتير عن زمان.
- كل أصحابي في مسرح مصر أصدقائي وكمان أحمد فهمي، محمد إمام، كريم محمود عبد العزيز، عمر متولي، لا ناس كتير وأنا حبيب الكل ده بجد الناس كلها بتحبني الحمد لله والله الوسط كله بيعشقني.
- المسرح ألوانه كتير اوي، احنا كنا بنعمل لون واحد منه وهو كوميديا الارتجال واحنا عملنا حاجة رجعت فكرة أن يبقى فيه مسرح قطاع خاص تاني، اللي كان شايف إن النوع ده مش مناسب ليه أو مش حابه يعمل أنواع تانية عشان يبقي فيه رواج.
- هم شالوا حاجات كتير في مقلب رامز بينت أن الموضوع ممكن يكون مبالغ فيه لكن العلاقة بيني وبين فاندام لما قعدت معاه أنا بحبه من طفولتي وكانت السينما الأمريكية بالنسبة لي فاندام وسيلفستر ستالون وأميتاب باتشان في الهند، ولما شوفته انبهرت بجد كمتفرج، وقولت في مقابلتي معاه وقولت في مقابلتي معاه أنا بحبك جدًا ومش مصدق إني قاعد قدامك، لحد ما قولت له في الآخر إنت مش مستوعب أنا بحبك قد إيه ومن كتر ما أنا فرحان ممكن أوطي على رجلك أبوسها وممكن يكون خاني التعبير بس احنا الدراج والشائع عندنا ممكن أقولك ده أنا من فرحتي ممكن أبوس راسك ده مش معناه إنه بيتقلل منك.
- كان نفسي في بنت أصلًا من وأنا صغير احنا 3 ولاد والبيت كان ناشف أوي في أمي وعيلة مراتي وأنا كان نفسنا في بنت.
-اشتغلت شغلانة قبل التمثيل ممكن الناس تشوفها عيب بس هي مش عيب، كانت شغلانتي اني احضن واحد بروح من الصبح لحد المغرب أحضنه وأقبض وأورح، والشغلانة دي اسمها السقف المعلق فمثلًا لو كان في بلكونة بيبقي محتاج عشان يشتغل حاجة تمسكه ف كنت بروح من الصبح أحضنه لحد ما هو يخلص شغل وكانوا بيدوني 50 جنيه
- متقدريش تقولي مين أهم كوميديانة في مصر لأن الأذواق مختلفة بس في نجوم كبار أوي، ده فيديوهات التيك توك بتضحكني قصدي أن الموضوع مش مقتصر على حد معين، والواحد عدى في حياته بأزمات حتى في موضوع التمثيل لو مكانش عداها بضحك مكانش كمل أصلًا، وعبلة كامل هي الأهم ونفسي أصلًا اشتغل معاها أو حتى أشوفها في الحقيقة.
- أنا بتقبل كل النقد بس بستغرب إن الواحد ممكن يقول قايل تصريحات في برنامج يسيبوا كل ده ويمسكوا في كلمة وماتكونش قايلها كده ويحاولوا يخلوها تبقى كده عشان تبقى غلطان، وكان بيضايقني لما حد ينقد مثلًا حد وميعجبوش تلاقيه بيشتم في الناس كلها بتاعة مسرح مصر المفترض اننا بعد ما خلصنا مسرح مصر كل واحد بقي بيتعامل بشكل فردي
- نجم مصر الأول هو عادل إمام
- مندمتش على أي عمل الحمد لله يعني حتى الأعمال اللي ممكن معملتش نجاح كبير اتعلمتها منها.
- الساعات الطويلة أسوء حاجة في مهنة التمثيل.
- مراتي دايمًا تقولي عندك طاقة سلبية بس أنا مش كده خالص.