تامر حسني يكشف عن غضبه ويوجه رساله لجمهوره:"جوايا زعل كبير"

" جوايا زعل كبير".. بتلك الكلمات حرص النجم تامر حسني، على توجيه نصائح جديدة إلى جمهوره، وتحدث عن تفاصيل من تجربته الشخصية.
تامر، عبر صفحته في موقع فيسبوك، كتب ،:"نهار جميل وليلة عظيمة إن شاء الله، والله يا جماعه بكتب البوست ده و أنا جوايا زعل كبير أوي على اللي لسه بيأثر فيه كلام الناس اتمنى إنكم بعد البوست ده يتغير مفهومكم شويه عن التأثر بكلام الناس المحبط والمهين، إن كانوا أصحابك أو أقرب الناس ليك أومن شرور السوشيال ميديا".
وأَضاف،:"عارف إن في كتير منكم أومعظمكم بتأثر فيه التعليقات السلبية ... هتكلم من خلال تجربتي الشخصيه بما إني شخصيه عامة و معرض أكتر منكم للموضوع ده .. في بداية حياتي كنت بتأثر لو حتى من تعليق واحد سلبي لدرجة إن دموعي ممكن تنزل من زعلي وأفضل أقول هو أنا زعلت الإنسان ده في حاجه عشان يشتم بالجحود ده لو كان نقد هقبله أكيد بس دي شتيمه ليا ولأهلي و تجريح وسخرية غير مبررة".
واستكمل:" المهم أدركت إن احنا بعد ظهور السوشيال ميديا ((بقينا في عصر أي حد ممكن يقول أي حاجه على أي حد )) يعني عصر فتن و بالتالي اللي الكاره هيصدق عشان عايز يصدق واللي بيحبك هيدافع لأنه رافض يصدق والشخص الطبيعي الحيادي هيبحث في الأمر ويعقلها بعقله وبقلبه وهيوصل للصح ..ملحوظه .. أكيد مقصدش حد مش كويس كل أفعاله مش كويسة و زعلان من كلام الناس ".
تامر تابع:" كلامي على اللي حاسس إنه مايستاهلش كده ... الزمن ده في موضة اسمها التنمر والتجريح والإهانة علناً وبلا رحمة و للأسف ناس كتير بقت بتحب تخرج الشر اللي جواها في الحقد و الكراهية والتريقه عشان يرتاحوا ويحسوا إنهم سفهوا و قللوا من فُلان عشان يحسوا إنهم أحسن منه و يعرفوا ياخدوا نفسهم".
واستكمل:"دول بقوا كتير لدرجة انها بقت عادة نميمة وغيبة و بهتان للبشر وعادة يومية كمان وهما مش واخدين بالهم، عشان النفس الأماره بالسوء والشيطان بيزينلهم العاده دي ويخليهم يحطوها تحت مسمى ( يا عم احنا بنهزر وبنضحك شوية ) لا لا لا نهزر عشان نضحك من غير ما نئذي مشاعر حد تمام ، بس هنهزر عشان نوصّل روح إنها تتئذي و تُحبط و تتكسر وجايز ضعاف منهم يئذوا نفسهم و يفكروا في الانتحار وتقولي بهزر لا لا لا، انت متعرفش هزارك او تنمرك على حد بيعمل في نفسيته إيه، و هو رايح بيته أو و هو لوحده حتى لو ضحك معاك وقتها و مبينلكش".
وأضاف:" لو انت مش واخد بالك من كده عادي خد بالك دلوقتي محدش اتولد فاهم، وواعي لكل حاجه اكيد بنغلط و بنتعلم ... المهم إن كلام الناس السلبي المؤذي في ناس بيحوشوا من خلاله ذنوب ملهاش حصر والناس اللي بيتغلط في حقها بتحوش بيه حسنات وبيتشال من عليهم ذنوب ملهاش حصر".
وأكمل موضحا،:" (( الحل ))يا تخليك في حالك و تبص في ورقتك بس - يا تعود نفسك ان ميطلعش منك غير كل ماهو خير - أو ياعم لو مضطر اأي تنظّر وهتموت لو منظّرتش خليك ناقد حيادي وخد بالك (( في فرق كبير بين انك ناقد و حاقد)) و ده بيبان في كلامك و انفعالاتك من غير ما تحس بس اللي حواليك بيحسوك فوراً .. فخلونا أحسن نختار اننا نبقى من اللي بيحوشوا حسنات و اللي مركزين في حالهم و باصين في ورقتهم أو الحياديين لو هينقدوا يقولوا كلام منطقي يتفهم .. عشان تهون على نفسك ... دايماً افتكر إن الرُسل نفسهم مسلموش من الإشاعات و كلام الناس .. لما كبرت أخذت عهد على نفسي وأقسمت بالله انفذه (( كل ما حد هيجرّح فيا ... هاخد قرار نجاح جديد )) و لو أنا دلوقتي عندي أكتر من موهبه وبسببها اخدت جوايز عالميه وحققت بيها نجاح، اعرفوا إن كل ده كان طموح و تحدي وإراده من فولاذ".
واستطرد:" و أحد اهم الأسباب جوايا هو كتر التحطيم و الطوب و الحروب و أدركت حاجه مهمة أوي اني ((مش هقدر أوقف ألسنة الناس بس أقدر أقفل ودني )) وأقدر كمان اسمّع ودني كل خير و كل إيجابي استمد منه طاقه رهيبه أكمل بيها عمري وأنجح بيها والأصعب انك تتعلم إن لو فلتت كلمه سلبيه من حد زعلتك تاخذها تحولها لوقود حرق ( بنزين ) تخليك تعلى أكتر يعني تتضرب بالحجارة تاخدها تلمها وتعمل بيها برج عالي تقف عليه ساعتها هتوصّل اللي حاربك وغلط فيك وأهانك انه يندم لأنه كان عايز يحطمك فا انت استخدمته بمخك وحولته لوقود يعني كان جاي يضرك فادك".
واختتم، :" المهم عقلك يبقى قوي و يتعامل كده مع المواقف .. يارب كلامي يوصل لكل متابعيني وغير متابعيني لأني بوصل حاجه تخص كل الناس من واقع تجربه حقيقيه اتمنى من قلبي تفيد كل اللي هيقراها، نهاركم أبيض".
النجم تامر حسني، طرح في رمضان الحالي، أغنية بعنوان "رمضان كريم"، من كلمات محمد مصطفى ملك، وألحان محمود أنور، وتوزيع محمد ياسر.
ويستعد تامر، لإحياء حفلا غنائيا يوم الجمعة 5 مايو بمركز المنارة بالتجمع الخامس ، ويتم طرح التذاكر خلال الأيام المقبلة.