"الناس كانت بتتسابق لعمل الخير"..أحمد موسى: المطرية وصلت العالمية

عقب الإعلامي أحمد موسى، على حفل الإفطار الجماعي لأهالي المطرية، قائلًا: "شكرًا لأهالي المطرية، ده بقى عادة للناس هناك كل عام والأسر كانت مجتمعة مع بعضها، الموضوع امتد إلى 4 آلاف شخص بعد ما بدأ بتجمع بسيط، ده بقى حالة مشهد إفطار 4 آلاف شخص على مائدة واحد وصل للعالمية".
وقال "موسى"، خلال برنامج "على مسئوليتي"، المذاع على قناة "صدى البلد"، اليوم السبت، إن حفل إفطار المطرية، كان تجمع شعبي كبير، مضيفًا: "كان في أغاني رمضان، الموضوع ده استمرار لكل عام، الإفطار شارك فيه أعضاء من السفارة الكورية الجنوبية، كمان أهالي المطرية كانوا عاملين حالة، سواء ستات ورجالة، كان التنظيم قوي جدا، والافطار كان في الشوارع".
وأوضح أن الأمر تطور هذا العام، وكانت الموائد في أكثر من شارع، قائلا: "أهالي المطرية كانوا عاملين حالة كبيرة، والتحضير للفطار، سواء كان الأكل محشي أو أي طعام آخر، الناس دي فكروني بالصعيد، واللي كان بيتم فيه، الأسر في الصعيد، كانوا يقعدوا مع بعض ويعملوا الفطار مع بعض، وبرضه كانوا بيعملوا كحك العيد مع بعض، أهالي المطرية رجعونا للمناسبات الجميلة، بيجهزوا المحشي مع بعض، والتجهيز للأكل، وتحضير مقادير الطبخ".
وأضاف، موسى: "إفطار المطرية بقى له موعد ثابت، وهو يوم 15 رمضان، كان في حاجات كويسة، وحلويات وأكل، وحاجة تليق وتحترم بجد، الموضوع ده كل القنوات العربية نقلت حفل إفطار أهالي المطرية، والتجمع كان كبير وفي حفاوة وحب وتجمع جميل، شوارع المطرية كانت حاجة جميلة، كان تجمع جميل، ده مش موائد رمضان، ده تجمع أهالي في شهر رمضان، كل الناس مع بعضها".
وأكمل: "في إفطار جماعي تاني يوم 21 رمضان استكمالا ليوم 15 رمضان، شوفوا المطرية وصلت فين، والاهتمام بكل حاجة، ونوعية الأكل، وكمان في أغاني وقرآن، وطقوس رمضان، كل ده كان موجود في اليوم الجميل في المطرية، بوجه لهم التحية على الحالة اللي ظهرت بها المطرية، كمان المظهر بتاع الأهالي جميل، فعلا رمضان في مصر حاجة تانية، هم دول المصريين، وعادة بيوت المصريين مفتوحة في رمضان، كل البيوت مفتوحة، خاصة في القرى والأرياف في مصر".
وواصل: "الناس كانت بتتسابق لعمل الخير، حاجة تفرح ومبهجة، كله في الشارع، متعرفش مين غني أو فقير، عزبة حمادة في المطرية، الكل زي بعضه، أعضاء سفارة كوريا الجنوبية، حضروا الإفطار بعد ما سمعوا عن الموضوع، يا له من يوم سعيد وجمال، وبيقول رمضان في مصر حاجة تانية".