قال الرئيس عبد الفتاح السيسي إن تكلفة ما نفذته الدولة من مشروعات في سيناء كان سيتضاعف إذا لم يتم تنفيذه خلال الفترة الماضية. وأضاف السيسي، خلال افتتاح عدد من المشروعات بالإسماعيلية، اليوم الأحد: حبيت بس أقول كم إن اللي عملتوه كان ممكن مايتعملش، ونأجله، صدقوني إذا كنا تكلفنا في سيناء 40 و50 مليار دولار، صدقوني دلوقتي كنا هنتكلفه بضعف وضعفين. وتابع الرئيس: طب إحنا عايزين إيه من الشركات دي، عايزين نزود حجم المكون المحلي، عشان قولنا إن كل المياه في المدن الساحلية تكون مياه تحلية، الكلام بيتعمل عشان يوفر فرص عمل للناس، وكمان يوفر عملة لمصر. وواصل الرئيس السيسي: اللي فات كوم واللي جاي كوم تاني، اوعوا تفتكروا هنقول متشكرين بالكلام بعد التضحية في سيناء، هنقول متشكرين بالاهتمام والعمل، واللي هيقوم بالكلام ده أهالي سيناء والشركات، اوعوا تفتكروا هنرضى باللي كان موجود قبل كده، لو مكنش ده في بالنا وتخطيطنا. واستطرد: أكتر ناس تعرف المعاناة انتوا، مش كمقاولين، ومش بس نتيجة الإرهاب، لكن نتيجة إجراءات التأمين، والأسمدة كنا بندخلها بحساب عشان ممكن تستخدم في حاجة تانية، أنا سعيد بيكم وبشكر كل أهالي سيناء، وكل الأسر اللي ضحت وخسرت أبناء، عزاءنا أن كان التمن ده هو تمن تنقية والتخلص من آفة موجودة كان الهدف منها تفقد الدولة هذا الجزء العزيز من وطننا. وزاد الرئيس: الجيش والشرطة مكنوش قادرين يتحركوا، بدليل هل حد كان بيسيبكم تعملوا طريق أو مشروع، هنتحرك بخطة كبيرة أوي الفترة اللي جاية، عايزين جهدكم عشان نحسس أهالينا بالجهد لأن مبقاش فيه عذر، مفيش عذر ان الشرطة تبقى مش موجودة أو منعملش تعليم، مطلوب كثافة أعلى في كل الملفات، بشكركم وبشكر أهالي سيناء، إحنا واحد، إحنا المصريين ودي بلدنا وأرضنا ونخلي بالنا منها ونموت عشانها.
