موقفه من المقالب وحكاياته مع "الزعيم" و"الملك" و"الأسطورة".. أبرز تصريحات هنيدي

ساعات قليلة وتستقبل دور العرض السينمائي فيلم "نبيل الجميل أخصائي تجميل" بطولة النجم الكبير محمد هنيدي، وقبل انطلاقه حرص على التواصل مع جمهوره عبر بث مباشر قام به أمس الاثنين على صفحته الرسمية على موقع "فيسبوك".
وجاءت تصريحات هنيدي في عدة مواضيع بينها حديثه عن دوره في الفيلم الجديد، وانتمائه الكروي، ومواقفه مع نجوم الفن "الزعيم" عادل إمام، "الملك" فريد شوقي، "الأسطورة" أحمد زكي، كذلك كشف عن عدم استبعاده تقديم أجزاء ثانية من أفلام شهيرة قدمها قبل سنوات وحققت نجاحات كبيرة ولاقت إعجاب الجمهور وقت طرحها.
ومن أبرز ما قال هنيدي..
- حبيت شخصية دكتور التجميل بسبب المواقف اللي بيتعرض ليها ودي تهمني بالنسبة للكوميديا، وحاجة تانية ان على مستوى الحياة كلها فيه ناس محتاجة تعمل تجميل من جوة مش من برة، من برة اه مهم لكن بحدود، المعنى بسيط.
- الهدف الأول من الفيلم الضحك، كلنا عايزين نضحك إن شاء الله يعجبكم، كلنا اجتهدنا من أول المخرج المبدع خالد مرعي والشباب اللي كتبوا الفيلم، والكوكبة الجميلة من النجوم كل واحد بطل ودور مهم.
- الخالة نوسة وحشتني جدا جدا وقام بتقليدها، وقلد شخصية رمضان مبروك أبو العلمين حمودة.
- المغرب شرفتنا وشرفت الكرة العربية مليون برافو.
- لأ مش ناوي أعمل برامج مقالب، أنا أصلا بخاف من المقالب أروح اعملها!، هو رموز (رامز جلال) جميل وشغال فيه حلو وبيحب الموضوع ده والناس بتحبه.
- أصعب مقلب عمله فيا رامز جلال كان الخاص بالطيارة.
- أنا زملكاوي وبحب الأهلي.. اللي هياخد الدوري هو اللي هيلعب أحسن ويتماسك أكتر.
- بإذن الله هنعمل جزء ثاني من صعيدي في الجامعة الأمريكية وبفكر دائما في رمضان مبروك أبو العلمين حمودة بحبه جدا.
- بإذن الله لو عملت مسلسل مش هيكون أكتر من 15 حلقة.
- همام في امستردام ممكن يتعمله جزء تاني مع انه وصل لهدفه في الجزء الأول، بس لو اتعمل هنشوفه في سنه الطبيعي وبقى ايه معتقدش يفشل تاني لأن اللي زي شخصيته بيبقى أسطورة.
- مش عارف إزاي خضر دخل الجيش، المؤلف أحمد عبدالله أقنعني بس نسيت، أنا ضحكت ضحك بسبب الموضوع ده.
- الإنس والنمس احتمال يكون له جزء تاني.
- سبب سعدي الصعيد وحبي في شخصية صعيدي في الجامعة الامريكية وعايز اجي بمسرحية.
- لعبت ماتش في المنوفية واتغلبنا 14 بسبب الأكل اللي أكلناه.
- النجم اللي نفسي اشتغل معاه الموهبة العظيمة أستاذ يحيى الفخراني.
- موهبة وحالة خاصة جدا ناس كتير بتستمتع بيها شيكابالا.
- ردا على موقف جمع بينه وبين عادل إمام أيام بخيت وعديلة، قال "الفيلم صورته وخلصته ومشيت وفجأة لقيتهم بيكلموني قالولي تعالى أستاذ عادل حطك في الفينال وكان المشهد الأخير بظهر مجنون وكان مهتم بيا جدا اقترح المشهد والإفيه".
- بشجع ليفربول أكيد.
- أحمد زكي عملت معاه فيلم البطل وعاشرته كتير وصارت بينا أخوة كان رجل جميل.
- من حسن حظي إن اتولدت وسط فنانين كبار، كلهم عاملوني كويس وكنت بحس بفرحتهم بيا، ولكن أكتر فنان كان داعم ليا بصورة كبيرة هو الفنان الكبير الراحل فريد شوقي.