تامر حسني: مرتبي كان 22 جنيه.. واشتغلت "فاعل" عشان أمي الغلبانة وأخويا العيان

وجه الفنان تامر حسني، عدة نصائح لجمهوره عبر حسابه بموقع "إنستجرام".
وكتب تامر: "قرأت معظم التعليقات على قد ما قدرت على آخر بوست ليا اللي فوق دا.. وفهمت أكتر حاجتين من تعليقاتهم عاملين إحباط لمعظمكم.. اليأس من النجاح.. إحباط المقربين.. وبعضكم واصل لفقدان الأمل والشغف وبعضكم فاقد الأمل في الحياة نفسها".
أضاف: "هطلب طلب منكم قبل أي شيء افتكروا معاناتي في بدايتي وظروفي الصعبة من غير أب ومن غير أي فلوس وبنزل أشتغل في الشوارع من عامل بنزينة لسوبر ماركت لفاعل يعني اللي بيبنوا العمارات بطلع طوب وأسمنت عشان أرجع بيتي لأمي الغلبانة بأي خمسة جنيه، بالإضافة لمرتب النادي لما كنت بلعب كورة كان مرتبي 22 جنيه في الشهر منهم بقى تحويشة الميه والكهربا وعمليات أخويا عشان كان عيان لفترة كبيرة، كنت بعمل المستحيل فعلاً عشان أمي وأخويا وعشان أوصل لهدفي".
تابع: "كان جوايا سعي دائم لطريقين الكورة والغناء، وبقول دا عشان ناس كتير عايز أنصحها بالخطة البديلة عشان لو الحلم مجاش يكون في غيره، زي ما أنا كان نفسي أبقى لاعب كورة والكورة مش ليا والأندية كلها مشوني رغم تفوقي، كنت بسأل نفسي ليه الأبواب كلها بتتقفل في وشي أتاريها بتتقفل عشان توجهني لمسار آخر، ولما آمنت بكده فهمت قدام أن ربنا كان شايلي الأحسن ليا بس ساعتها مكنتش فاهم، واللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايماً أطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لا بس اجتهد واتعب عشان المجهود دا ليه كرم متحوشلك في مجالك التاني، فاوعى تقول تعبت على الفاضي".
استكمل: "وبالنسبة للمحبطين هيفضلوا موجودين أنت اللي بتسمعلهم وأنت اللي بتسمح إنك تتأثر بيهم، امنع دا فوراً متبقاش السبب في أذية نفسك، متتشدش غير لكل جميل ولكل إيجابي، هتلاقي كل الحلو بيجيلك ومتعملش العكس عشان هيجيلك برضو، عشان كدا بقولك أنت السبب دايماً، قول يارب واجتهد وافهم أن الراحة المطلقة في الجنة بس وإحنا على الأرض وربنا قال إنه خلقنا في كبد يعني شقاء، عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصعب ووصلوا يبقى الموضوع فينا".
اختتم: "متبقاش أكبر عدو لنفسك، أنت السبب، خد قرار صارم فوراً في التغيير والنهوض والنجاح، والله هتوصل متسمعش غير لقلبك وسلم قلبك للّي خلقه وتوكل على الله".
ومن ناحية أخرى يُعرض لتامر حسني حاليا فيلم "بحبك" في السينمات، بطولة النجوم: هنا الزاهد، حمدي الميرغني، هدى المفتي، مدحت تيخا، وغيرهم، تأليف وإخراج تامر حسني في أولى تجاربه بالإخراج السينمائي.
View this post on Instagram
A post shared by Tamer Hosny (@tamerhosny)