"عايزة حقي".. شيرين: "علاقتي بحسام حبيب سامة ولازم أروح أتعالج منها"

قالت الفنانة شيرين عبدالوهاب: "أنا محافظة على نفسي وست ب 100 راجل وأنا زي الفل بس لازم أروح أتعالج منه ومن آثاره عليا ومن ناس مكنوش مقدرين قيمتي".
وأضافت "شيرين" في مداخلة هاتفية لبرنامج "كلمة أخيرة" على فضائية "أون إي" اليوم الثلاثاء: "حبه زي السرطان ومش عارفه أخرجه مني لأنه حب وعلاقة سامة"، موضحة: "أنا ست بخلف وزي الفل و4 سنين أقعد معاه ربنا ميردش أخلف منه عشان ربنا حاميني وعشان الناس اللي شايفني ببيع، أنا صعبانة على الناس كلها".
وتابعت: "أنا خرجت خروجة في الساحل تامر حبيب شافني قعد يعيط نص ساعة"، مؤكدة: "أنا ست كويسة بس متحصلش إني أكون في بلدي ووسط أهلي وناس وأتسرق باسم الجوازة دي"، موضحة: "العربية باسمي وهو لم يلتزم بالتوكيل وفي شهود على الكلام دا".
وأردفت: "لما يتقال إني هيتعملي محضر بالسرقة تبقى حصلت كده أنا عايزة حقي وأنا اللي هجيب حقي، وموضوع العربية حصل النهاردة الصبح، وانا في الساحل ومحتاجة مأذون شرم ولما أنزل هثبت بالأوراق والشهادات من البنوك أن كل الحاجات دي أنا اللي كنت بدفعها وكنت متكفلة بالكامل بمصاريف بيته الثاني عشان والدته ووالده ميقولوش ضيعتي عمر الولد، وهو طول عمره مش بيعمل حاجة وهما باصين لي في كل شيء".
وأكدت: "لما كنت بعمل أغنية وبتنجح أمه كانت بتقول اشمعني ابني طب أعمل ايه، كنت بدفع الفلوس ال 10 % اللي بيطالب بيها عشان مسمعش كلامهم".
وردت شيرين على مقاطعة الإعلامية لميس الحديدي: "قولًا واحدًا عايزة أتأكد أنه لا عودة لحسام حبيب"، قائلة: "دانا أتجوز الفيل ومتجوزوش أو أتجوز قرد من حديقة الحيوان".
وأكدت: "أنا مش عايزة أعرف حد أسمه حسام واعتزلت الاسم دا من حياتي وهاخد إجراءات قانونية ضد فكرة سرقة عربيتي لأنه شقى عيالي لأنهم في آخر يوم كانوا هيتضربوا بالرصاص".